Primeiru-Ministru, Taur Matan Ruak, prezide Reuniaun Konsellu Ministru iha CCD, kuarta (08/04). Imajen Tatoli/Egas Cristovão

DILI, 08 abríl 2020 (TATOLI) – Konsellu Ministru (KM) aprova ona projetu Dekretu-Lei, ne’ebé aprezenta husi Ministra Finansa ein ezersísiu, Sara Lobo Brites, atu regula ba Fundu COVID-19, ne’ebé Parlamentu Nasionál (PN) autoriza no Prezidente Repúblika (PR), Francisco Guterres ‘Lú Olo’, dekreta ona montante millaun $150.

Ministra Finansa ein ezersísiu, Sara Lobo Brites, informa ezekutivu sira aprova ona Dekretu-Lei ba ezekusaun fundu COVID-19.

“Ohin, hetan aprovasaun husi konsellu Ministru, maibé sei iha alterasaun balun no espera katak tempu badak bele haruka ona ba Prezidente Repúblika hodi promulga, nune’e ita bele hahú ezekuta Fundu COVID-19 ne’e”, tenik Ministra Sara Lobo iha Sentru Konvesaun Dili (CCD, sigla portugés), kuarta ne’e.

Notísia Relevante: PR Promulga Transferénsia Estraordinária Millaun $250 Hosi Fundu Petrolíferu

Governante ne’e informa, fundu COVID-19 estabelese mós hanesan fundu autónomu ida ne’ebé integradu iha administrasaun direta Estadu nian.

Iha ámbitu Ministériu Finansa, nia dehan fundu COVID-19 ho montante millaun $150, atu finansia despeza relasiona ho prevensaun no kombate  COVID-19.

Nune’e mós, ba despeza ne’ebé mak relasiona ho akizisaun ba ai-moruk, materiál, ekipamentu médiku no sasán esensiál sira, inklui instalasaun no manutensaun ba fatin  kuarentena no izolamentu, ho formasaun no operasionalizasaun profisionál ne’ebé envolve iha prevensaun no kombate COVID-19, ho protesaun sosiál ba vítima husi SARS-CoV-2 no despeza seluk ne’ebé relasiona ho luta kontra Coronavírus foun ida ne’e.

“Aprovasaun ba medida prevensaun sira no kombate COVID-19 sei finansia husi fundu ne’ebé antes ne’e hetan aprovasaun husi Komisaun Interministeriál, ba koordenasaun implementasaun medida prevensaun no kontrolu surtu Coronavírus”, nia akresenta.

Nia refere liútan, ba prosesu husi aprovizionamentu no kontratasaun kona-ba despeza sira ne’ebé finansia husi fundu refere,  sei realiza tuir termu Rejime Jurídiku aprovizionamentu no husi Kódigu Kontratu Públiku.

Administrasaun Fundu ida ne’e, kabe ba Konsellu Jestaun, ne’ebé prezide husi Membru Governu ne’ebé responsável ba área finansa, kompostu husi Membru Governu ne’ebé responsável iha área saúde nian no negósiu estranjeiru no apoiu tékniku administrativu lojístiku ne’ebé nesesáriu ba funsionamentu husi fundu ne’ebé sei fornese husi Ministériu Finansa.

Antes ne’e, iha loron 6 abríl, Prezidente Repúblika promulga Dekretu Parlamentu Nasionál númeru 14/V, kona-ba autorizasaun ba realizasaun transferénsia estraordinária husi Fundu Petrolíferu ho montante millaun $ 250.

Husi totál orsamentu millaun $250 ne’ebé aprovadu iha Parlamentu Nasionál, millaun $150 sei aloka ba finansiamentu medida prevensaun no kombate moras COVID-19 iha ámbitu Fundu COVID-19, millaun $100 ba Konta Jerál Tezouru no hosi millaun $150 ne’e, aloka $500.000 ba Parlamentu Nasionál atu dezenvolve polítika no programa iha ámbitu prevensaun no kombate surtu COVID-19.

Iha loron 2 abríl 2020, Parlamentu aprova orsamentu millaun $250 no iha loron tuir mai, sesta (03/04), haruka ba PR Lú Olo.

Jornalista: Florencio Miranda Xinenes

Editora: Julia Chatarina

HAKEREK NO HATÁN

Please enter your comment!
Please enter your name here