DILI, 08 abríl 2020 (TATOLI)-Governu liuhusi Embaixada Timor-Leste iha Indonézia fó sai ona karta deliberasaun ida atu oferese subsídiu ba estudante Timoroan sira ne’ebé daudaun ne’e,  estuda iha nasaun ne’ebá,  durante implementasaun lockdown iha Aeroportu no Fronteira Terrestre ba prevensaun COVID-19.

Tuir karta deliberasaun ne’ebé Agência TATOLI asesu hosi Embaixada iha Jakarta, tersa (07/04/2020) informa,  oras ne’e  hasai ona apela ida ba estudante sira atu hahú prienxe formuláriu inskrisaun hodi manda ba email no númeru whatsapp ne’ebé aneksu ona iha formuláriu refere.

“Governu Timor-Leste deside atu disponibiliza subsidiu modesto ida ba estudante sira ne’ebé mak deside hakmatek iha fatin ne’ebé sira estuda ba (Indonézia). Kona-ba ida ne’e Embaixada sei atualiza hikas ba estudante sira bainhira iha ona instrusaun husi Governu Sentrál,”sita iha karta deliberasaun ne’e.

Tanba ne’e, Embaixada husu nafatin  ba estudante sira atu hakmatek iha  idak-idak nia fatin  no proíbe ka bandu halo viajén ba zona risku COVID-19 iha nasaun ne’ebá.

“Bainhira ita hanoin ita-nia rain, ita-nia maluk sira, ita tenki hakmatek, dalan di’ak liu maka hakmatek iha ita-nia fatin atu nune’e labele hetan susar no lori fali susar ba ema seluk,”reforsa tan.

Hosi karta deliberasaun ne’ebé fó sai informa mós  kona-ba voo ba aviaun komérsiu taka ona, maibé fronteira terrestre motain sei loke kada loron kuarta ho oras rua hahú tuku 10:00 to’o 12:00 otl.

Maibé ba estudante sira ne’ebé deside hela metin iha Indonézia durante implementasaun estadu emerjénsia, Reprezentante Embaixada Timor-Leste iha Jakarta sei kontinua akompaña situasaun no kondisaun estudante sira nian.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here