Primeiru-Ministru, Taur Matan Ruak, prezide Reuniaun Konsellu Ministru iha CCD, kuarta (08/04). Imajen Tatoli/Egas Cristovão

DILI, 08 abríl 2020 (TATOLI) – Iha reuniaun Konsellu Ministru ordinária kuarta ne’e, aprova Rezolusaun Governu hodi fó atribuisaun subsídiu ba timor-oan ne’ebé mak hela iha estranjeiru, relasiona ho surtu COVID-19.

Diploma ne’e aprezenta husi Ministru Negósiu Estranjeiru no Kooperasaun, Dionísio da Costa Babo Soares.

“Aprovasaun husi Konsellu Ministru ne’e, hodi hala’o atribuisaun subsídiu ba timor-oan ne’ebé mak hela iha estranjeiru, tantu estudante sira ne’ebé hetan bolseiru no la hetan bolseiru, hodi bele rezolve pandemia Coronavírus, inklui salvaguarda ba saúde públika no ba protesaun bein-estár sosiál no ekonómiku ba sidadaun nasionál sira”, refere nota impresa ne’ebé Agência Tatoli asesu, kuarta ne’e.

Diploma ne’e, atu estabelese mekanizmu ida atu apoiu no fó protesaun ba sidadaun sira iha estranjeiru, ne’ebé deklara falta meiu finanseiru, hodi bele suporta despeza loron-loron nian no ba sira ne’ebé depende de’it ba rendimentu família nian.

Aleinde ne’e, Konsellu Ministru aprova mós alterasaun Dekretu Governu ida ho númeru 3/2020 loron 28 marsu, kona-ba medida ezekusaun ba deklarasaun Estadu Emerjénsia, hodi efetua husi Dekretu Prezidente Repúblika númeru 29/2020, loron 27 marsu.

Ho alterasaun ida ne’e, sei suspende  temporariamente hahú husi segunda loron 13 abríl 2020 ba sidadaun sira husi nasionalidade oioin, ne’ebé tama mai iha territóriu nasionál.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here