Ekipa Médiku COVID-19 rega hela ai-moruk líkidu desinfection ba sasán ne’ebé estudante sira hodi prevene surtu COVID-19. Imajen/Eugénio Pereira

DILI, 08 abríl 2020 (TATOLI)-Relasiona ho transmisaun surtu COVID-19 mai Timor-Leste, Governu liuhusi Ministériu Negósiu Estranjeiru no Kooperasaun (MNEK), fó sai ona sei la autoriza tan Timoroan iha diaspora liliu iha Indonézia atu kontinua fila mai rai-laran iha semana oin.

Maski kuarta (08/04/2020) ohin, estudante Timoroan iha Indonézia pruvolta 100-resin maka fila mai Timor-Leste liuhosi Fronteira Terrestre Motain, Postu Administrativu Balibo Munisípiu Bobonaro, maibé iha semana oin sei taka totál hodi hein desizaun estadu nian tuir mai.

 Notísia Relevante :Timoroan 146 Hosi Indonézia Kontinua Tama Timor-Leste

“Ohin sira mai ne’e ikus ona, semana oin ne’e sei lá tama tan ona maski sira nia viza mate nasaun sira ne’ebé sira hela ne’e fó toleránsia,” deklara Ministru Negósiu Estranjeiru no Kooperasaun (MNEK) Dionísio Babo Soares, ba Jornalista sira iha Sentru Konvensaun Dili (CCD-sigla portugés), kuarta (08/04/2020).

Iha parte seluk, tuir nia nasaun Austrália fó ona toleránsia ba Timoroan no sidadaun estranjeiru seluk atu hela iha nasaun ne’ebá maski vistu mate no sei bele renova fila fali iha fulan 12 durante pandemia globál surtu sei akontese.

No iha Indonézia mós fó ona toleránsia ba ema estranjeiru durante fulan haat atu hela maski vistu mate ona.

Tuir dadus estudante Timoroan 4000-resin maka finansia hosi governu hodi estuda iha rai-li’ur seidauk konta ho sira ne’ebé maka suporta hosi família.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here