Ministru Negosiu Estranjeiru no Kooperasaun, Dionisio Babo Soares. Imajen/Egas Cristovao

DILI, 08 abríl 2020 (TATOLI)-Governu liuhusi Ministériu Negósiu Estranjeiru no Kooperasaun (MNEK), husu ba inan-aman no família estudante sira ne’ebé oras ne’e estuda iha rai-li’ur atu aprezenta naran ba kada embaixada idak-idak hodi hetan apoiu subsídiu hosi Governu.

“Inan aman sira ha’u husu favór ida haruka imi-nia oan sira-nia naran ho kritéria kompletu ba embaixada, tanba Konsellu Ministru aprova tiha ona atu apoiu subsídiu balun,” apela Ministru Negósiu Estranjeiru no Kooperasaun (MNEK) Dionísio Babo Soares, ba Jornalista Sira iha Sentru Konvensaun Dili, (CCD-sigla portugés), kuarta (08/04/2020).

Notísia Relevante : Governu Sei Oferese Subsídiu ba Estudante iha Indonézia

MNEK maka aprezenta proposta ne’e ba Konsellu Ministru no hetan aprovasaun hosi Membru Governu sira foinlalais, relasiona ho problema pandemia globál ne’ebé akontese iha mundu tomak.

Tuir Governante ne’e katak governu seidauk deside montante orsamentu hira maka sei fó ba estudante sira, maibé sei baseia de’it ba kustu iha nasaun idak-idak.

Ba bolseiru sira sei la simu subsídiu Governu ne’e hodi simu de’it orsamentu bolsu estudu nian ne’ebé antes ne’e governu tranfere kada fulan-fulan.

“Estudante hirak ne’ebé governu fó bolsa estudu ne’e sira mós simu nafatin sira-nia osan bolsa estudu nian, sira atu eskola ka lá eskola governu fasilita nafatin fó nafatin osan ba sira,”tenik Babo.

MNEK koordena ona ho Embaixadór no Konsúl Timor-Leste nian iha estranjeiru inklui Ministériu Ensinu Superiór hodi buka mekanismu di’ak ba implementasaun subsídiu ne’e iha tempu badak.

Jornalista       : Hortencio Sanchez

Editór             : Agapito dos Santos

HAKEREK NO HATÁN

Please enter your comment!
Please enter your name here