Reuniaun Konsellu Ministru. Imajen Tatoli/Egas Cristovão

DILI, 08 abríl 2020 (TATOLI) – Governu liuhosi desizaun Konsellu Ministru (KM) iha kinta ne’e, aprova ona projetu deliberasaun ne’ebé aprezenta husi Ministra Finansas ein ezersísiu, Sara Lobo Brites, kona-ba kontratu fiskalizasaun ba obra reabilitasaun estrada Hera-Manatuto.

Tuir nota imprensa ne’ebé Agência Tatoli asesu, projetu ida ne’e finansiadu husi empréstimu ida ho Banku Aziátiku Dezenvolvimentu (ADB, sigla inglés) no Ajénsia  Kooperasaun Internasionál Japaun (JICA, sigla portugés).

Progresu ezekusaun fíziku ba projetu estrada sira ne’ebé utiliza osan empréstimu tanba afeta husi problema oin-oin, liuliu problema administrativa no indemnizasaun (kompensasaun).

Projetu husi fundu impréstimu ne’ebé la’o tarde mak hanesan projetu reabilitasaun estrada nasionál Dili-Manatuto-Baucau.

Finansiamentu ba projetu reabilitasaun estrada ne’e husi Orsamentu Jerál Estadu 2019 no mós husi fundu ne’ebé Governu Timor-Leste impresta husi Governu Japaun liuhosi JICA.

Nune’e, obra reabilitasaun ne’e fahe ba trosu rua, ida uluk maka husi Dili ba Manatuto, konstrusaun hahú iha loron 30 jullu 2016, iha Hera (Dili) no ramata iha loron 25 abríl 2019, iha ponte Lakló (Manatuto) ho nia naruk maka kilómetru 48,74.

Empreza ne’ebé kaer obra ne’e maka Sinohydro Corporation Limited husi Xina ho kustu totál milliaun $48,87.

Trosu daruak mak husi Manatuto ba Baucau, sei hahú iha loron 18 agostu 2016, iha Lakló (Manatuto) no ramata iha loron 14 maiu 2019, iha munisípiu Baucau.

Trosu ne’e ho distánsia kilómetru 57,702 no empreza ne’ebé responsável ba obra ne’e maka Shanghai Construction (Group) General Co., Ltd. husi Xina ho kustu totál ba obra ne’e mak milliaun $59,55.

Antes ne’e, Ministériu Obra Públika (MOP), Ministériu Planeamentu no Investimentu Estratéjiku (MPIE) no mós Ajénsia Dezenvolvimentu Nasionál (ADN), hala’o audiénsia públiku ho Komisaun C, ne’ebé trata Asuntu Finansa Públika.

Ministru Obra Públika, Salvador Eugênio Soares dos Reis Pires, klarifika katak obra trosu hanesan Dili-Manatuto-Baucau tarde tanba kestaun oioin, liuliu administrativa no indemnizasaun ba eis propriesaun ba rai.

Governante ne’e esplika ba membru Komisaun C no Komisaun E ne’ebé trata Asuntu Infraestrutura, katak kestaun administrativa no indemnizasaun mak hanesan fatór ne’ebé kontribui ba atrazu projetu.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here