Primeiru-Ministru, Taur Matan Ruak, prezide Reuniaun Konsellu Ministru iha CCD, kuarta (08/04). Imajen Tatoli/Egas Cristovão

DILI, 08 abríl 2020 (TATOLI) – Primeiru-Ministru, Taur Matan Ruak no membru sira husi Sala Situasaun, Sentru Integradu Jestaun Krize (CIGC, sigla portugés), halo aprezentasaun ba Konsellu Ministru kona-ba pontu situasaun husi atividade no estratéjia ba prevensaun no kombate COVID-19.

Ekipa CICG ne’ebé lideradu husi Xefe Governu, aprezenta mós objetivu operasionál haat hodi mantein ka hamenus índise husi propagasaun  COVID-19.

Objetivu operasionál sira mak hanesan dahuluk, garantia ba fatin kuarentena ne’ebé adekuada ba sidadadaun hotu, ne’ebé to’o iha Timor-Leste no ba sidadaun sira ne’ebé hetan kontaktu ho kazu pozitivu husi  SAR COV 2.

Daruak maka halo identifikasaun ba kazu suspeitu sira, ne’ebé realiza ba teste laboratóriu no izolamentu ba kazu pozitivu COVID-19.

Nune’e mós, datoluk maka ba fatin izolamentu no tratamentu, iha nível akuizisaun ba ekuipamentu sira, ai-moruk no instalasaun, inklui mobilizasaun no formasaun ba rekursu umanu.

Ikus liu, dahaat hala’o esforsu filafali ba medida kontensaun, hanesan ijiéne ba ema, distansiamentu sosiál no fíziku no konfinamentu voluntáriu.

Membru sira husi CIGC informa mós ba ezekutivu sira katak entre loron 1 marsu to’o 7 abríl 2020, rejista ona totál hamutuk ema 1.726 ne’ebé hala’o vijilánsia no ema 1.072 mak iha konfinamentu obrigatóriu iha fatin hamutuk 29 no fatin kuarentena ne’ebé mak prepara husi Governu no ema hamutuk 654 mak hala’o auto-kuarentena iha sira nia uma.

Aleinde ne’e, CIGC mós rejista ema hamutuk 818, kompostu husi ema 164 husi fatin kuarentena obrigatória no ema 654 iha auto-kuarentena ne’ebé mak termina ona períodu loron 14 iha fatin kuarentena sei simu sertifikadu husi Ministériu Saúde.

Ekipa ne’e mós, aprezenta kona-ba prioridade prinsipál sira ba tempu badak nian mak hanesan preparasaun espasu foun konfinamentu obrigatóriu nian, preparasaun ba fatin iha Tasi-tolu, hodi halo izolamentu no tratamentu, hodi hasa’e kualidade ba kapasidade laboratóriu no hasa’e kualidade ba kondisaun iha fatin  kuarentena.

Tuir planu, sesta oin mai sei aprezenta no halo análiza ba loron 14 dahuluk husi vijénsia Estadu Emerjénsia

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here