Primeiru Ministru, Taur Matan Ruak. Imajen/Antonio Goncalves

DILI, 08 abril 2020 (TATOLI)–Primeiru-Ministru (PM), Taur Matan Ruak, hato’o mensajen Páskua nian ba timoroan tomak liuliu sarani Katólika atu durante Semana Santa ne’e reza ba Maromak atu nune’e Maromak bele hadook moras COVID-19 hosi Timor-Leste no timoroan ida-idak. 

Primeiru-Ministru, Taur Matan Ruak, hato’o mensajen ne’e hafoin hasoru malu ho Xefe Estadu Francisco Guterres “Lú Olo” hodi husu retira Pedidu demisaun ne’ebé hato’o ba Xefe Estadu iha loron 22 fulan fevereiru tinan ne’e.

“Loron Páskua hanesan loron importante loos. Loron família sira-nian. Infelizmente tinan ida ne’e, ita-nia festa la hanesan baibain tanba moras ida ne’ebé la’o lemo-lemo iha mundu no Timor mós labele sees husi moras ida ne’e. Tanba ne’e, ha’u husu ba sidadaun sira hotu, kontinua nafatin kumpre regra sira maibé iha uma halo meditasaun. Husu (reza) ba Maromak atu tulun ita ida-idak, ita-nia família sira liuliu ita-nia nasaun, hasees moras ne’e (COVID-19) husi ita no ita-nia família sira,” dehan Primeiru-Ministru, Taur Matan Ruak, ba jornalista sira iha Palásiu Prezidensiál Bairru Pité, Dili, kuarta ne’e.

Antes ne’e, Arsebispu Arkedioseze Metropolitana Dili, Dom Virgílio do Carmo da Silva, SDB, husu ona ba sarani idaidak, atu durante semana Santa, akompaña misa husi uma, tuir regra sira no desizaun ne’ebé Conferencia Episcopal Timorense (CET) fó sai ona, hodi prevene surtu COVID-19 labele da’et.

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here