Xefe Departamentu Sinál Tránzitu Diresaun Nasionál Transporte Terrestre (DNTT), João Eugênio da Silva. Imajen Tatoli/Egas Cristovão

DILI, 08 abríl 2020 (TATOLI) – Xefe Departementu Sinál Tránzitu, Diresaun Nasionál Transporte Terrestre (DNTT), João Eugênio da Silva, husu ba komunidade sira ne’ebé maka atu halo viajen ba munípiu tenke kuidadu-an tanba agora tama ona iha Semana Santa.

“Agora daudaun ita tama ba iha Semana Santa. Tanba ne’e husi Diresaun Nasionál Transporte Terrestre husu atu ita hotu ne’ebé hakarak halo viajen ba munisípiu, tantu halo viajen iha Dili tenke kuidadu-an”, dehan ba Agência Tatoli via telefónika, kuarta ne’e.

Maski nune’e, nia adianta, ho situasaun sira hanesan agora Timor-Leste infrenta, labele halo viajen lai ba munisípiu tanba iha hela Estadu Emerjénsia nia laran, nune’e kontribui ba prevensaun Coronavírus.

Nia konsidera, asidente ne’e ita hotu la espera, tanba ne’e maka husu komunidade sira tenke kuidadu-an no bainhira halo viajen karik la bele ansi.

“Kuidadu-an iha viajen ne’e, tanba vida ne’e folin boot liu hotu. Ha’u hanoin ho situasaun ida Estadu Emerjénsia ne’e, di’ak liu hotu-hotu tenke hakmatek iha uma ho família. Ne’e di’ak liu hodi prevene moras Coronavírus, tanba kuandu iha nesesidade duni atu halo viajen maka foin ba di’ak liu”, nia akresenta.

Nune’e, Xefe Departementu ne’e husu ba komunidade sira ne’ebé hakarak atu halo viajen ba munisipiu, atu kumpre nafatin regra kondusaun tantu karreta ka motór, signifika tenke kondús karreta no motór ho velosidade neneik no labele ansi.

“Hanesan ha’u dehan ona katak estadarte velosidade ba karreta ne’ebé halai iha Dili laran ne’e, kondús ho kilometrajen 40 to’o 45 de’it, kuandu ba foho ho motór bele halai kilometrajen 45 to’o 50, maibé kareta halai iha Dili laran ne’e ho kolometrajen 50 to’o 55 no ba munisípiu kondús ho velosidade kilometrajen 60 to’o 65  de’it, labele liu”, dehan João Eugênio.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here