Xefe Suku Comoro, Eurico da Costa de Jesus.

DILI, 07 abril 2020 (TATOLI)–Xefe Suku Comoro, Eurico da Costa de Jesus heteten, nia parte informa beibeik ba komunidade sira kona-ba regra Estadu Emerjénsia ba ninia komunidade sira hodi prevene an hosi surtu COVID-19 hodi atu tuur hakmatek iha uma.

“Ha’u informa liuhosi Xefe Aldeia sira atu aviza ba komunidade sira kona-ba  situasaun Estadu Emerjénsia ne’e. Ema hotu-hotu tenke tuur hakmatek iha ida-idak nia uma. Bainhira presiza sosa  nesesidade bázika mak foin sai maibé tenke uza sasán protesaun hanesan máskara no luvas,” dehan Xefe Suku Comoro, Eurico da Costa de Jesus, ba Ajénsia TATOLI liuhosi entrevista via telefone, tersa ne’e.

Nia hatutan, Konsellu Suku la serbisu mesak maibé serbisu hamutuk ho polísia no mós Xefe Aldeia sira hodi halo seguransa no vijilansia ba komunidade sira ne’ebé mak la iha objetivu mak sai no halo movimentu iha fatin públiku sei atua hosi seguransa.

“Ami serbisu hamutuk ho seguransa no Xefe Aldeia sira. Bainhira komunidade ulun-fatuk toos, ami sei entrega ba polísia atu atua. Tanba moras at ne’e fasil da’et no fasil hamate ema. Tanba ne’e, presiza parte hotu nia kontribuisaun atu oinsá atu kada ema bele proteje an hosi moras ne’e,” nia sujere.

Xefe Suk ne’e deklara, iha fatin públiku balu ne’ebé mak komunidade kontinua halibur malu hanesan iha futu-manu fatin, rotunda, merkadu no pior liu mak komunidade balu movimentu ba mai iha dalan no estrada públiku ne’e, kontribui ba estadu hodi hakmatek iha uma.

Tanba ne’e, liuhosi mídia Online Ajénsia TATOLI ne’e, nia husu ba ninia komunidade sira ne’ebé hela iha Suku Comoro, iha aldeia 14 nia laran, ho totál populasaun hamutuk ema na’in 33.000 resin ne’e hakmatek hela iha ida-idak nia uma.

“Tanba ne’e, liuhosi mídia Online Ajénsia TATOLI ne’e, ha’u husu atu komunidade hakmatek ba. Karik iha presiza ruma mak sai. Se la presiza, di’ak liu hakmatek iha imi ida-idak nia uma,” nia apela.

Notísia Relevante: Governu Husu Komunidade Kumpre Medida 16 Durante Estadu Emerjénsia

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here