Prezidente Repúblika, Francisco Guterres Lú Olo, simu karta kredensiál hosi Embaixadór Japaun iha Timor-Leste, Kinfuchi Masami. iha Palásiu Prezidente Nicolau Lobato, Bairru Pité. Tersa (07/04/2020). Imajen/Egas Cristovão

DILI, 07 abril 2020 (TATOLI)–Xefe Estadu, Francisco Guterres “Lú Olo”, apresia no agradese ba kooperasaun bilaterál Timor-Leste ho Japaun ne’ebé sai metin ba beibeik hafoin nasaun rua ne’e estabelese relasaun diplomátika desde 2002 to’o ohin loron.

“Prezidente Repúblika hato’o ninia kongratulasaun ba emperor foun. Prezidente Repúblika hein katak Embaixadór Kinefuchi Masami bele hatutan serbisu sira ne’ebé xefe misaun anterior hala’o tiha ona hodi hametin liután relasaun entre nasaun rua,” dehan Dionisio Babo Soares ba jornalista sira hafoin akompaña embaixadór foun Japaun mai Timor-Leste, Kinefuchi Masami, entrega karta kredensiál ba Prezidente Repúblika(PR), Francisco Guterres “Lú Olo” iha Palásiu Prezidensiál Bairru Pité, Dili, tersa ne’e.

Nia hatutan, Embaixadór Japaun mós agradese ba Prezidente Repúblika tanba maski iha situasaun difísil (Estadu Ermerjénsia) bele simu ninian karta kredensiál.

Dionínisio mós konta tuir katak, Japaun nu’udár país ida ne’ebé fó apoiu ba Timor-Leste desde kedas Timor-Leste hetan ninian independénsia.

“Reuniaun doadores dahuluk ba dezenvolvimentu iha Timor-Leste hala’o iha Japaun, iha 1999. Apoiu Japaun iha Timor-Leste iha área oin-oin hanesan kapasitasaun rekursu umanu, agrikultura no dezenvolvimentu rural, infraestrutura, marítima, edukasaun, bee-moos, sanitáriu no kooperasaun trilateral tau matan ba kosteiras,” nia haktuir,

Tuir esplika, Governu Japaun konstrui edifísiu ba Fakuldade Enjiñaria UNTL iha Hera, Ponte Komoro no sei reabilita aeroportu internasionál Prezidente Nicolau Lobato. Governu Japaun fó nia apoiu ba prosesu adezaun Timor-Leste ba ASEAN no Organizasaun Mundiál Komérsiu.

}Iha kooperasaun multilateral, Timor-Leste apoiu Japaun ba Komisaun Nasoeons Unidas ba Direitu Internasionál Komérsiu, Komité Direitus Umanus, Komité Intergovernamentál ba Salvaguarda, Tribunal Internasionál ba Justisa, Vise Presidente Asembleia Jerál iha 2018 no Organizasaun Marítima Internasionál,” nia haktuir.

Entretantu, Ministru Negosiu Estranjeiru no Kooperasaun, Dionísio Babo informa, bazeia ba pedidu husi Governu Timor-Leste ninian, Japaun sei apoiu osan liu miloens $1 ba prevensaun surtu COVID-19 iha Timor-Leste, liuhusi organizasuan Internasionál The United Nations Children’s Fund (UNICEF).

Notísia Relevante: Governu Husu Timoroan iha Rai-Liur Labele Mai Timor-Leste

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here