DILI, 07 abríl 2020 (TATOLI) – Organizasaun Nasaun Unida ne’ebé kaer fundu ba labarik (UNICEF, sigla inglés) iha Timor-Leste (TL) daudaun ne’e fó ona apoiu ba Governu hodi prevene surtu Covid-19.

Ofisiál Komunikasaun UNICEF iha TL, António Gomes, hateten sira nia apoiu ba governu liuhosi Ministériu Edukasaun Juventude Desportu (MEJD) estabelese ona programa eskola ba uma, hodi fasilita estudante sira estuda durante loron feriadu liuhosi publikasaun RTTL, EP. TVE no online.

Notísia Relevante :Estadu Emerjénsia, MEJD Fasilita Aprendizajen ba Estudante Liuhosi Mídia

“Ami ajuda Ministériu Edukasaun oinsá iha matéria labarik sira bele estuda iha uma liuhosi televizaun, radiu, dezenvolve hanesan brosura sira ba labarik sira hodi aprende”, dehan Antonio ba Agéncia Tatoli via telefone tersa ohin.

Alende ne’e sensibilza informasaun kona-ba Covid-19 ba sidadaun defisiénsia sira atu oinsá halo prevensaun.

“Kona-ba orsamentu loloos ha’u haree ona iha servisu fatin, maibé seidauk iha tanba ne’e ami sei fó sai, montante ne’e maibé la bo’ot ida”, nia esplika.

Entretantu, atu apoiu kombate Covid-19 iha rai-laran, Embaixada Japaun mós sei apoiu orsamentu ba UNICEF no Federasaun Internasionál ba Cruz Vermella no Crescente Vermellu (IFRC, sigla inglés) ho montante millaun ida dolár amerikanu.

“Loos ami simu informasaun katak Japaun sei apoiu ami, maibé orsamentu loloos ba UNICEF ami seidauk hatene nia montante hira”, katak António.

Nia haktuir UNICEF mós hetan apoiu orsamentu hosi Uniaun Eropeia, Banku Dezenvolvimentu Aziatiku (ADB, sigla inglés), Ajénsia Amérika nian ba Dezenvolvimentu Internasionál (USAID, sigla inglés).

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here