Tanki bee ne'ebé monta iha fatin públiku hodi ajuda komunidade fase liman, hodi kombate Covid-29. Imajen UNICEF

DILI, 7 abríl 2020 (TATOLI) – Uniaun Eropeia (UE) ho Fundus Nasoens Unidas ba Labarik (UNICEF, sigla inglés) anúnsia ona medida oin-oin hodi prevene propagasaun Covid-19 iha Timor-Leste (TL).

Medida sira ne’e anunsia ona husi Andrew Jacobs, Embaxadór UE iha TL ho Valérie Taton, reprezentante UNICEF iha TL.

Tuir nota komunikadu ne’ebé Tatoli simu hosi mídia officer UNICEF katak kuadru legál parseria ba nutrisaun integradu iha TL, UE ho UNICEF konkorda ona kona-ba medida komplementár sira, ho orsamentu kombinadu $450.000, ba apoiu esforsu sira hala’o hela husi Governu TL atu prevene propagasaun Covid-19.

“Uniaun Europeia hamrik iha liña oin atu ba hatan krize corona virus multilaterál no iha Timor-Leste servisu hamutuk hela ho Governu, UNICEF no Organizasaun Mundiál Saúde atu garante asaun preventiva forte sira no kordenadu”, dehan Andrew Jacobs, Embaxadór UE iha TL. Hodi hatutan tan: “Uniaun Europeia hamrik hamutuk ho Governu no povu Timor-Leste iha tempu ida difisil ne’e.”

Ho fundu hosi UE, UNICEF sei apoia Ministériu Obras Públika no Ministériu Saúde iha konstrusaun sistema báziku bee, saneamentu no ijiene iha área públiku sira no fasilidade saúde sira iha Dili ho potensiál espansaun ba munisípiu Baukau.

UNICEF mós sei apoia MS nia servisu atu reforsa esforsu konsientizasaun iha nivel komunidade-nian ba medida nesesaria sira atu prevene propagasaun Covid-19. Video rua kona-ba promosaun fase liman fó sai ona iha GMN TV liuhusi kolaborasaun entre UE ho UNICEF. Alende ne’e buat ida importante liu mak liuhusi MS Ekipamentu Protesaun Pesoál (EPP) balun sei desponivel ba professional saúde sira.

“Pandemia Covid-19 ne’e tenke hapara ona, no ita hala’o buat hotu hamutuk mak ita bele apoia Governu iha nia determinasaun hodi prevene propagasaun iha Timor-Leste”, dehan Valérie Taton, reprezentante UNICEF iha TL.

“Ho apoiu husi Uniaun Europeia, ita fiar-án katak, ami nia esforsu sira hala’o hela mak atende populasaun nia nesesidade ba melloramentu asesu ba bee iha area xave públika sira hodi hetan informasaun salva-vida nian ba komunidade”, afirma Taton.

Implementasaunba elementu hirak seluk husi parseria ba tinan lima entre UE ho UNICEF atu hadi’a programa nutrisaun maternál no infantil sei kontinua iha períudu ne’e.

”Ita sei kontinua servisu hamutuk ho Governu Timor-Leste ba manutensaun programa melloramentu nutrisaun maternál no infantil, melloramentu asesu ba bee, servisu sira ba saneamentu no ijiene, imunizasaun rutina no protesaun labarik. Ita sei la sees husi pandemia ne’e no hasoru buat seluk saida de’it mak bele prevene, hanesan labarik sira hetan moras mak bele prevene husi vásina, ka má nutrisaun aumenta”, dehan Taton. (ki)

HAKEREK NO HATÁN

Please enter your comment!
Please enter your name here