Membru PNTL halo hela seguransa iha Tasi-Tolu.Imajen/Antonio Goncalves

DILI, 07 abríl 2020 (TATOLI) – Polísia Nasionál Timor-Leste (PNTL) kontinua halo auto stop ka pasa revista ba movimentu transporte públiku no privadu-sira atu tula pasajeiru  no tula família tenke kumpre distánsia sosiál ka distánsia fíziku.

Notísia Relevante : PNTL Apela Nafatin ba Populasaun Atu Hakmatek iha Uma

Komisáriu Faustino da Costa uza mikrofone halo aviza ba públiku atu obedese ba regra Estadu Emerjensia. Imajen/Mídia PNTL

“Ita haree sirkulasaun transporte públiku hahú maka’as no la’o normal hanesan baibain. Ita la bandu, maibé ita  halo pasa revista atu karreta sira tula ema karik tenke uza máskara no kumpre distánsia fízika,”  hateten Komandante Jerál  PNTL, Komisáriu Faustino da Costa, ohin, ba jornalista-sira iha Kuartél Jerál, Fatuhada, Dili.

Nia hateten, movimentu karreta hahú maka’as hodi tula ema barak iha laran la iha distánsia no kontinua la’o livre nafatin, tanba ne’e, Komandu PNTL sei koordena ho komandante munisípiu hotu la inklui Rejiaun Administrativu Espesiál Oe-Cusse Ambeno (RAEOA) hodi fó orientasaun atu bele halo auto stop.

Komisáriu Faustino da Costa dehan, tuir avaliasaun PNTL nian iha implementasaun estadu emerjénsia iha violasaun regra movimentu ema nian kuaze hahú normal hanesan baibain no iha merkadu ne’ebé la ho distánsia fíziku.

Komisáriu Faustino da Costa, apela ba populasaun hotu atu kumpre regra estadu emerjénsia hodi prevene transmisaun surtu Coronavirus ka COVID-19.

Jornalista : Nelson de Sousa

Editór       : Francisco Simões

 

HAKEREK NO HATÁN

Please enter your comment!
Please enter your name here