Traballadór sira iha to'os Kununurra, Western Australia. Imajen/Raitech.

Austrália, 04 abríl 2020 (TATOLI)–Ministru Agrikultura Australia, David Littleproud informa, partisipante programa serbisu sazonál (SWP, sigla portugés) iha Austrália bele estende tan sira-nia rezidénsia ka estadia to’o fulan 12 ka tinan ida.

Governante ne’e heteten, mudansa ne’e afeta kuaze ema millaun 2,17 ne’ebé daudaun ne’e iha Austrália ho vistu temporáriu inklui mós ema 7000 hosi SWP.

Tuir nia, dehan desizaun pragmátiku ne’e refleta tebes oinsá traballadór estranjeiru sira-nia importánsia ba nasaun nia indústria.

“Saida maka ami dehan ba sidadaun estranjeiru sira ho vistu temporaria ne’e maka se sira prepara atu hela iha nasaun ida ne’e no ajuda ami atu ultrapasa Coronavírus ne’e, ami sei estende sira-nia vistu,” nia dehan Ministru Agrikultura Australia, David Littleproud.

Hosi mudansa sira ne’e hotu, nia hatutan, traballadór SWP sira ne’e bele estende sira-nia vistu to’o fulan 12 maibé kompañia limite sira-nia vistu to’o de’it fulan neen, nune’e limitasaun refere Governu Austrália kansela hodi sira bele halo estende vistu to fulan 12. Maibé traballador sira tenke aseita atu tama kuarentena durante loron 14 antes muda ba distritu seluk.

“Iha devér no responsabilidade hosi agrikultór, indústría no vistu na’in atu garante katak sira tuir kuarentena,” governante ne’e hateten.

Bainhira traballadór sira enfrenta difikuldade iha finanseira, sira bele asesu ba sira-nia pagamentu pensaun. Pagamentu ne’e normalmente iha situasaun normál traballadór sira bele asesu bainhira fila ona ba sira-nia rai liu fulan ida, maibé ho situasaun ida ne’e sira bele asesu kuandua enfrenta problema finanseira.

Líder sira hosi indústria lokál halo ona diskusaun krítika ho Governu kona-ba preokupasaun iha menus traballadór sira hosi numeru SWP no backpacker liuliu iha tempu Governu aplika regra bandu estranjeiru movimentu mai iha rai-laran no ida ne’e implika tebes tanba indústria balu menus traballadór.

“Ida ne’e situasaun krítika tebes ba ita-nia seguransa ai-han no ita-nia nasaun maibé sei kontinua loke merkadu esportasaun.Ami rona husi agrikultór sira no ami garante katak ami halo ida ne’e ho responsabilidade katak enfrenta duni rekerimentu saúde nian,” Littleproud dehan.

Prezidente Nasionál Federasaun Agrikultura, Fiona Simpson hateten, situasaun ne’e fó desizaun serteza ba empreza barak enfrenta menus iha traballadór.

“Setór agríkola ne’e depende ba iha kombinasaun entre traballadór rai-laran no hosi rai-li’ur ne’ebé serbisu ku’u ai-fuan, modo no falun modo sira halo prontu ba sidadaun australianu sira hodi konsume. Sein prezensa traballadór internasional sira-nian, agrikultór barak maka sei husik hela sira-nia produtu sai maran no mate,” Fiona Simpson dehan iha nia deklarasaun.

Entretantu Sekretaria Estadu Formasaun Profisionál no Empregu (SEFOPE) fulan kotuk suspende rekrutamentu ba traballadór Timor-Leste atu haruka bá Koreia Súl no Austrália durante nasaun sira suspende turista sira-nia prezensa iha rai sira ne’ebá.

“Ami husu atu ita hotu kontinua kalma no hein Governu Austrália no Koreia loke sira-nia aireportu ba traballadór internasionál sira inklui mós Timor-Leste,” Sekretáriu Estadu SEFOPE, Julião da Silva dehan.

Traballador barak fila ona ba sira-nia rai relasiona ho surtu COVID-19, barak liu durante loron 14 kuarentena hela ba traballadór sira ne’ebé mai hosi nasaun li’ur.

Jornalista : Robert Baird

Editór       : Cancio Ximenes

HAKEREK NO HATÁN

Please enter your comment!
Please enter your name here