Koordenadór Forsa Tarefa Ligasaun COVID-19, Rui Maria de Araujo. Imajen Tatoli/Jogerjo Guterres

DILI,07 abríl 2020 (TATOLI)-Portavóz Sala Situasaun Sentru Integradu Jestaun Krize, Rui Maria de Araújo  hateten tuir dadus hosi fulan-janeiru to’o tersa (07/04/2020), abríl 2020, Timor-Leste seidauk rejistu suspeitu ho surtu COVID-19 ho númeru iha maka’as.

Nia dehan to’o tersa ohin, suspeitu Coronavirus hamutuk ema na’in 46, pozitivu mantein na’in ida, negativu 41 no na’in haat sei iha prosesu provavel katak seidauk iha rezultadu teste laboratóriu maka indika ona nia pozitivu ka negativu.

Tuir dadus iha segunda (06/04/2020), suspeitu COVID-19 ema hamutuk 44 maibé ohin aumenta tan na’in rua.

Notísia Relevante :TL Mantein ho Pozitivu COVID-19 Na’in Ida

Nia relata abitante hamutuk 958 maka kumpre kuarentena obrigatóriu no auto-kuarentena hodi hela de’it iha uma. Sira ne’ebé hela iha kuarentena obrigatóriu hamutuk 884 no ema na’in 74 kuarentena iha uma.

“Hanesan horiseik públiku tomak akompaña to’o ohin totál ne’ebé periódu konfinamentu obrigatóriu loron 14 hamutuk ema 736 no husi 736, ema 617 mak iha kapitál Dili no 119 mak iha Munisípiu,” katak Portavóz Rui Maria de Araújo durante Konferénsia imprensa iha Sentru Konvensaun Dili, (CCD-sigla portugés), tersa (07/04/2020).

Iha Rejiaun Autónomu Espesiál Oé-Cuse Ambeno (RAEOA), abitante na’in 68 maka kumpre kuarentena obrigatóriu no iha Atauro ema na’in haat maka auto-kuarentena iha uma no pasa ona loron 14.

“Pontus importante mak jestaun krize hakarak hato’o ba públiku mak dahuluk atu haree ba dadus sira ohin la iha aumentu barak iha númeru suspeito nian iha 24 oras ikus ne’e,”katak Eis Primeiru-Ministru durante Governu Konstitusionál daneen.

Jornalista : Felicidade Ximenes

 Editór      : Agapito dos Santos

HAKEREK NO HATÁN

Please enter your comment!
Please enter your name here