Portavós CIGC no Koordenadór Ofisiál Ligasaun Forsa Tarefa COVID-19, Rui Maria de Araújo. Imajen Tatoi/Egas Cristovão

DILI, 07 abríl 2020 (TATOLI)–Portavóz Sala Situasaun Sentru Integradu Jestaun Krize (CIGC-sigla Portugés), Rui Maria de Araújo kontinua apela ba sidadaun iha territóriu Timor-Leste atu uza nafatin máskra tanba meiu ida ba prevensaun surtu COVID-19.

Eis Primeiru-Ministru, Rui Maria de Araújo hato’o apela ne’e relasiona ho populasaun barak maka to’o ohin seidauk kumpre desizaun estadu emerjénsia hodi uza máskra ba prevene sira-nia an.

“Sentru Integradu Jestaun Krize hakarak husu ba públiku atu uza máskra iha situasaun surtu hanesan ne’e, ita haree máskra ida naran maskra sirúrjika loloos profisionál saúde de’it mak uza, maibé situasaun hanesan agora ne’e hotu-hotu bele uza,” katak nia durante konferénsia imprensa iha Sentru Konvensaun Dili (CCD-sigla portugés), tersa ne’e.

Eis Líder Ezekutivu iha Governu Daneen ne’e sujere atu populasaun bele suku rasik máskra iha idak-idak nia fatin bainhira estoke máskra iha merkadu laiha.

“Bainhira ita laiha máskra ida sirúrjíka ita bele halo máskra ida-ne’ebé bolu naran kajeira ne’ebé bele halo rasik iha uma, máskra ne’ebé suku rasik bele uza ilástiku ho hena ne’ebé algudaun depois rua hosi laran no hosi li’úr ne’e para fasilita no proteje di’ak,” nia fó hanoin tan.

Tuir nia, ba sidadaun sira bainhira atu uza máskra tenki fase uluk liman ho sabaun. Máskra sirúrjika uza dala ida de’it bainhira bokon ona. Enkuantu, máskra kajeira tenke fase loron-loron depois uza hodi la hamosu tan moras seluk.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here