Prezidente Rede Feto Timor-Leste, Judite Dias Ximenes. Imajen /Nelson de Sousa

DILI, 07 abril 2020 (TATOLI)–Prezidente Rede Feto, Judite dias Ximenes hateten, Rede Feto liuhosi parte advokasia halo sensibilizasaun kona ba surtu COVID-19 no situasaun atuál iha rai laran ba komunidade sira iha teritóriu Timor-Leste tomak.

Sensibilizasaun ne’e, nia hatutan, Rede Feto hala’o hamutuk ho Organizasaun Mundiál Saúde (OMS), Ministériu Saúde (MS), Polisia Nasionál Timor Lorosa’e (PNTL) no Sosiedade Sivíl hodi fahe informasaun oinsá halo protesaun ba moras COVID-19.

“Objetivu husi transmisaun ida ne’e parte advokasia husi Rede Feto nian atu halo sensibilizasaun kona ba Covid-19 no situasaun atuál ba ita-nia komunidade sira iha teritóriu Timor. Nune’e sira mós bele hatene oinsá mak bele proteje sira-nia an hosi moras no desimina informasaun kona-ba regra balu ne’ebé mak Estadu Emerjénsia dekreta ona katak hotu-hotu hakmatek iha uma,”  dehan Judite dias Ximenes ba Ajénsia TATOLI liuhosi entrevista hafoin hala’o talk show iha TVE, Comoro, Dili, tersa ne’e.

Ho manieira ida ne’e, nia dehan, organizasuan Rede Feto halo nune’e bele ajuda nia komunidde sira iha área rurál sira bele asesu nune’e bele halo auto kuarentena iha ida-idak nia uma.

Tanba, nia hateten, tuir Diretora Nasionál Saúde Públiku, Ministériu Saúde, Isabel Gomes hateten relasiona ho COVID-19 MS husu atu ema hotu presiza kumpre regra Estadu Emerjénsia nune’e bele Evita moras ne’e.

Maibé, tuir nia, realidade ne’ebé mak iha hatudu katak komunidade barak mak seidauk iha konsiénsia atu banati tuir regra Estadu Emerjénsia nian.

“Iha realidade komunidade barak mak sei kontinua movimentu iha dalan públiku. Tuir loloos ita tenke kumpre regra ne’ebé ita-nia na’in ulun sira dekreta ona. Se ita la kumpre mak sei fó impaktu negativu ba ita-na an no ba família no mós ba komunidade,” nia dehan.

Ebtretantu, Xefe Ekipa Jurídiku PNTL, Inspetór Virgílio Correia hateten, halo prevensaun la’ós mai hosi de’it PNTL maibé hotu-hotu tantu komunidade tenke kontribui hodi aplika halo distánsia sosiál no distánsia fíziku nune’e surtu COVID-19 labele da’et.

“Ita hotu hatene katak moras ne’e perigozu ba ita-nia vida tanba fasil da’et husi ema ida ba ema seluk. Tanba ne’e, ita husu atu komunidade sira ne’ebé mak laiha nesesidade atu la’o labele la’o sai. Di’ak liu tuur iha uma no halo proteje an beibeik,” dehan Inspetór Virgílio Correia.

Tanba, nia hatutan, PNTL nia papél mak hala’o no aprosima nafatin ba komunidade sira atu hadook an hosi moras COVID-19 mak tenke hakmatek iha uma.

“Husu mós bai inan-aman sira atu kuidadu ita-nia oan sira no joven sira labele halo movimentu no halo grupu iha dalan públiku,” nia hatutan.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here