Prezidente Repúblika,Francisco Guterres Lú Olo. Imajen Tatoli/António Gonçalves

DILI, 07 abril 2020 (TATOLI)–Prezidente Repúblika Francico Guterres “Lú Olo”, promulga Dekretu Parlamentu Nasionál númeru 14/V kona-ba autorizasaun ba realizasaun transferénsia estraordinária hosi Fundu Petrolíferu ho montante millaun $250.

Tuir komunikadu ne’ebé Ajénsia TATOLI asesu husi mídia Prezidénsia Repúblika hateten, osan ho montante millaun $250 sei utiliza ba prevensaun no kombate moras COVID-19, finansia Konta Jerál Tezouru no ba Parlamentu Nasionál atu dezenvolve polítika no programa iha ámbitu prevensaun no kombate surtu COVID-19.

Husi total orsamentu millaun $250 ne’ebé aprovadu iha Parlamentu Nasionál, millaun $150 sei aloka ba finansiamentu medida prevensaun no kombate moras COVID-19 iha ámbitu Fundu COVID-19, millaun $100 ba Konta Jerál Tezouru no hosi millaun $150 ne’e mak aloka tan $50 mil ba Parlamentu Nasionál atu dezenvolve polítika no programa iha ámbitu prevensaun no kombate surtu COVID-19.

Iha kinta (02 abril 2020) ne’e, Parlamentu Nasionál aprova orsamentu millaun $250 no iha loron tuir mai, sesta (03 abril 2020) Parlamentu Nasionál haruka ba Prezidente Repúblika no iha segunda (6 abril 2020), Prezidente Repúblika promulga Dekretu Parlamentu Nasionál ne’e.

Iha dekretu ne’e kria Fundu COVID-19 ne’ebé ho finalidade finansia despeza sira relasiona ho prevensaun no kombate moras ne’e. Osan hosi Fundu ne’e sei utiliza ba sosa medikamentu, material no ekipamentu médiku, instalasaun no manuntensaun fatin sira ba kuarentena no izolamentu, formasaun no operasionalizasaun profisionál envolve iha prevensaun no kombate moras COVID-19 no protesaun sosiál ba vítima moras COVID-19.

Entidade ne’ebé sei responsabiliza ba Fundu mak Konsellu Jestaun ne’ebé sei jere hosi membru Governu iha área finansa no saúde no Fundu COVID-19 sei regula hosi Governu.

Finansiamentu ba Konta Jerál Tezouru sei utiliza ba funsionamentu Administrasaun Públika no prestasaun serbisu mínimu ba protesaun sosiál, pagamentu pensaun no subvensaun públika hanesan ba antigu Kombatente Libertasaun Nasionál, idozu sira no benefisiáriu husi Bolsa da Mãe.

Jornalista : Cipriano Colo

Editór       : Cancio Ximenes

1 KOMENTÁRIU

  1. Osan milaun USD$. 500 nee aloka ba Parlemento Nasional atu lori halo saida? Parlamento atu halo politika hodi Duni sai Virus Covid-19 nee ka oinsa? Presisa esplika detalhu ba publiku alokasaun orsamento refere.

HAKEREK NO HATÁN

Please enter your comment!
Please enter your name here