Ministériu Saúde liuhusi pesoál saúde sira iha munisípiu Dili, tama no sai bairru hodi vásina labarik sira. Imajen António Goncalves/dokumentasaun TATOLI

DILI, 7 abríl 2020 (TATOLI) – Organizasaun Saúde Mundiál (OMS) liuhosi Diretóra Rejionál OMS Rejiaun Sudeste Asiátika, Dr Poonam Khetrapal Singh, husu ba Nasaun hotu atu investe iha edukasaun ba área enfermajen no obsetritísia, empregu no lideransa hodi haforsa sistema saúde no igualdade jéneru.

Diretóra OMS ba Rejiaun Sudeste Asiátika, Dr Poonam Khetrapal Singh. Imajen OMS/Violaine Martin

Mensajen iha ámbitu selebrasaun tinan internasionál ba enfermeiru no parteira sira, OMS konsidera enfermeiru no parteira sira maka baze fundamentál ba atendimentu servisu kuidadu saúde primária ba ema hotu-hotu.

Tuir komunikadu ne’ebé TATOLI simu, OMS haktuir enfermeiru sira mak efetivu liu hodi fornese atendimentu saúde ne’ebé bele prevene moras, promove saúde, no tratamentu ba ema ne’ebé sofre moras mentál no fíziku no sira ne’ebé iha defisíensia.

Parteira sira, katak nota komunikadu ne’e fornese tratamentu saúde ne’ebé esensiál ba feto hotu-hotu atu hetan esperiénsia di’ak durante partu, ba labarik hotu atu moris mai ho seguru, no prevene bebé foin moris no labarik sira husi mortalidade no moras.

Responde globál ba COVID-19 hatudu ona oinsá enfermeiru sira importante tebes ba seguransa saúde nian. Sira tenke hetan apoiu maka’as hodi halo sira-nia servisu ho di’ak.

OMS iha Rejiaun Sudeste Áziatika kompromete haforsa traballadór iha área enfermajen no obstetrísia hanesan parte ida husi misaun hodi atinje kobertura saúde universal (KSU).

KSU nu’udar Prioridade Emblemátika ida husi prioridade ualu iha rejiaun ida ne’e ho meta ida ne’ebé maka reinforsa Objetivu Dezenvolvimentu Sustentavel 3, meta ba saúde nian.

Iha tinan 2015, rejiaun ne’e hahú objetivu ba dékada hodi haforsa traballadór iha área saúde – xave inisiativa ne’ebé ho objetivu responde ba traballadór ne’ebé menus no lakuna ba abilidade iha área saúde iha rejiaun tomak.

Iha tinan 2018, rejiaun ne’e mós konsege aumenta ona enfermeiru no parteira sira husi nain 18 ba kada populasaun 10 000, aumenta husi nain 16 ba kada populasaun 10 000 iha tinan 2014. Iha tinan 2018, númeru médiu globál ba enfermeiru no parteira sira iha de’it nain 37 ba kada populasaun 10 000. Enkuantu númeru mínimu tenke iha ema nain 40.

“Ita tenke aumenta liután ita-nia esforsu: tinan 2030 rejiaun ne’e sei presiza enfermeiru no parteira sira hamutuk milliaun 1.9. Ita tenke haree liu ba ida ne’e hodi garante enfermeiru no parteira sira kolokadu iha área ne’ebé presiza liu sira-nia atendimentu ba saúde – liu-liu iha área rurál”, nota komunikadu ne’e afirma.

OMS iha karta ne’e hatutan, oportunidade hotu-hotu, ema sira ne’ebé envolve iha polítika no administradór sira tenke enkoraja pesoál saúde feto sira – liuliu enfermeira no parteira sira – hodi atinje papél iha lideransa no envolve másimu iha foti desizaun. Enfermeiru no parteira sira hotu tenke hetan pagamentu ne’ebé justu.

Agora iha mundu tomak selebra tinan Internasionál ba enfermeiru no parteira sira. “Ita tenke selebra, suporta no haforsa traballadór iha área enfermajen no obstetrísia, ne’ebé maka foka iha xave área balun”.

Tuir OMS, tenke haforsa edukasaun iha área enfermajen no obstetrísia. Mudansa iha demografia mak muda nesesidade ba atendimentu saúde no aumenta ezijénsia bo’ot liu ba atendimentu iha NCD, atendimentu ba idozu no ema sira ne’ebé ho moras susar atu kura.

Ba enfermeiru no parteira sira bele responde nesesidade hirak ne’e, ema sira ne’ebé envolve iha polítika no administradór sira tenke avalia edukasaun ba pre-atendimentu, inklui dezenvolve kurríkulu no kapasidade, no bainhira nesesáriu, bele hadia fila fali.

Hirak ne’e tenke garanti enfermeiru no parteira sira hetan oportunidade atu aumenta sira-nia abilidade profesionál inklui treinamentu, hodi haforsa sira nia koñesimentu no abilidade. Dezafiu ba loron aban nian sei la hanesan ho ohin loron, realsa.

Daruak, ema sira ne’ebé envolve iha polítika no administradór sira tenke garante ambiente servisu ba enfermeiru no parteira sira ne’e seguru, saudavel no satisfá. Oras servisu ba enfermeiru no parteira sira tenke razoavel no aliña ho lei ba traballadór nian. Tenke minimiza perigu ba enfermeiru no parteira sira ne’ebé enfrenta iha servisu fatin, bainhira posivel, di’ak liu halakon tiha perigu hirak ne’e.

Tuir loloos, OMS afirma enfermeiru no parteira sira labele hetan violénsia. Liuhosi kria ambiente ida ne’ebé maka pozitivu no amigavel, ba sira ne’ebé envolve iha polítiku no administradór sira sei aumenta númeru rekrutamentu, mantein atu emprega nafatin enfermeiru no parteira sira no motivasaun ba sira. Ida ne’e importante tebes ba nasaun hotu atu hadi’ak kualidade atendimentu saúde iha área rurál.

Datoluk, tenke foka liubá haforsa lideransa iha área enfermajen no obstetrísia no jestaun nian. Evidénsia hatudu nasaun sira ne’ebé nia ofisiál ba enfermajen no programa lideransa ba enfermajen iha duni monitorizasaun forte ba enfermajen no obsetrísia. Ida ne’e ajuda sira hodi garanti atu hetan abilidade no kapasidade ne’ebé adekuadu no bele servisu hamutuk iha ekipa ne’ebé foka iha área oi-oin. Ida ne’e mós signifika bainhira dezenvolve estratéjia ruma, sira sei hetan benefísiu barak liu hosi koñesimentu no esperiénsia ne’ebé maka enfermeiru no parteira sira iha.

Enfermeiru no parteira sira tenke hetan oportunidade hodi bele dezenvolve sira-nia potensiál ba lideransa no partisipa iha oportunidade atu bele foti desizaun.

Ita presiza halo investimentu adisionál. Relatóriu Mundiál ba Enfermajen dahuluk iha Rejiaun ne’e hatudu nasaun ho rendimentu kiik no médiu tenke halo investimentu adisionál USD 10 per kapita ba edukasaun iha enfermajen de’it.

Maioria iha nasaun seluk, katak OMS ida ne’e bele atinje liuhosi fundu doméstika. Iha nasaun balun, parseiru dezenvolvimentu no institusaun finanseiru sira bele ajuda iha parte ida ne’e. Liuhosi halo investimentu kapitál umanu ba edukasaun, empregu, jéneru no área seluk ba estratéjia traballadór saúde nasionál, parseiru sira bele haforsa traballadór iha enfermajen no obstetrísia enkuantu kria mós oportunidade ba servisu, igualdade jéneru no envolve foinsa’e sira.

OMS Rejiaun Sudeste Áziatiku tenke suporta no aselera progresu hirak ne’e. Ita agora iha tinan dalimak ba Dékada hodi Haforsa Traballadór iha área Saúde.

“Ita tenke aselera iha pasu hirak ne’e hodi bele atinje meta hirak ne’e. OMS kompromete atu suporta nasaun hotu iha Rejiaun ida ne’e hodi bele haforsa sira-nia traballadór iha área enfermajen no obstetrísia atu ita hotu bele atinje ita-nia objetivu prinsipál ida ne’e. Saúde ba ema hotu ne’e posivel. Ita bele — ita tenke — realiza ida meta ida ne’e”.  (KI)

HAKEREK NO HATÁN

Please enter your comment!
Please enter your name here