Osan Dolar Amerikanu. Imajen/Espesiál

DILI, 07 abríl 2020 (TATOLI)-Ministériu Saúde to’o segunda (06/04/2020) gasta ona orsamentu hamutuk rihun 347 hosi orsamentu millaun ida ne’ebé antes ne’e Governu aprova iha Reuniaun Konsellu Ministru hodi halo prevensaun ba surtu coronavirus.

Diretór Nasionál Orsamentu Jestaun Finanseira, Ministériu Saúde, Marcelo Amaral informa faze dahuluk, Ministériu Finansa aprova  rihun 498, ezekuta ona rihun 347 ho ninia pursentu 85 (%) no sei restu hela rihun 151.

”Orsamentu ba preparasaun COVID-19 ne’e gastu ba formasaun no mós ba pesoál saúde sira ne’ebé atu trata pasiente COVID-19  no mós advokasia iha Munisípiu sira ba komunidade sira no mós halo promosaun saúde,” relata, Marcelo Amaral ba Agência TATOLI via telefone, segunda (06/04/2020).

Notísia Relevante :KM Aprova Osan $1.5 Millaun Atu Prevene Virus Corona

Hosi montante orsamentu ne’e, Ministériu Saúde aloka rihun 300 ba UNICEF hodi sosa ekipamentu ba apoiu servisu  pesoál saúde sira hanesan ai-moruk, no fasilidade promosaun saúde.

Iha parte seluk, Portavóz Sentru Integradu Jestaun Krize, Odete Viegas da Silva, reforsa tan katak hosi orsamentu millaun 1.5 ne’ebé KM aprova ne’e, millaun ida ba Ministériu Saúde no rihun 500 ba Ministériu Negósiu Estranjeiru no Kooperasaun (MNEK).

“Ekipa tékniku hato’o  proposta orsamentu dahuluk ba Ministériu Finansa purvolta rihun 498 entaun osan ida ne’e maka fahe mós ba iha esplikasaun sira husi pilár ida too lima,”nia esplika.

Exemplu pilár ida maka halo promosaun liliu involvimentu komunidade ba prevensaun COVID-19, komunikasaun  no pilár haat seluk tan.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here