Embaixadora Timor-Leste ba Austrália Inês Maria de Almeida.

Austrália, 06 abríl 2020 (TATOLI)–Embaixadora Timor-Leste iha Austrália, Inês Maria de Almeida, louva mudansa ne’ebé halo hosi Governu Austrália hodi autoriza traballadór timoroan sira estende tan sira-nia rezidénsia iha nasaun refere durante tinan ida.

Nia hatutan, ida-ne’e nu’udar desizaun di’ak ida ba traballadór timoroan ema na’in-1200 ne’ebé daudaun ne’e serbisu hela iha Austrália.

“Embaixada apresia tebes ho aranjamentu ne’ebé halo hosi Governu Austrália. Hela iha toos, bá Austrália no bá Timor-Leste,” Inês Maria de Almeida informa ba TATOLI.

Nia heteten, desizaun ne’e Governu Austrália foti tanba sira enfrenta númeru menus hosi traballadór sira iha nasaun ne’e hafoin país refere foti medida hodi taka fronteira no fatin entrada hotu relasiona ho surtu COVID-19.

Maib’e, tuir nia, daudaun ne’e Ministru Agrikultura Austrália anunsia katak traballadór sira bele estende sira-nia vistu to’o fulan 12. Mudansa refere aplika de’it ba traballadór sira ne’ebé serbisu iha área aprovadu hanesan indústria, agrikultór no saúde.

Entretantu, Sekretaria Estadu Formasaun Profisionál no Empregu (SEFOPE) suspende rekrutamentu ba traballadór SWP iha marsu loron 20 hodi hateten programa sei kontinua suspende bainhira Austrália hasai ona regra bandu enstranjeiru.

Embaixadora ne’e hateten, embaixada serbisu makaas ho kontrapartida atu hetan solusaun ba traballadór timoroan sira ne’ebé daudaun ne’e iha hela Austrália ho vistu ne’ebé besik ramata ona antes Governu hasai regra restrisaun ba estranjeiru sira no distánsia sosiál.

Embaixadora ne’e realsa tan, iha parte seluk traballadór timoroan sira sei deside atu estende ka hakarak atu fila bá uma.

“Embaixada entende katak situasaun ne’e kria inserteza tebes ba traballadór timoroan sira, barak lakon sira-nia família no prefere liu atu hela iha uma. Maibé, ida-ne’e situasaun ida-ne’ebé nunka akontese antes no akontese fora hosi ita-nia kontrolu,” nia dehan.

Nia hateten, se ema ruma koko atu fila bá Timor-Leste sei hasoru mós difikuldade signifikante, primeiru, transporte aéreu Autoridade Aviasaun Sivíl Timor-Leste suspende voo internasionál tama no sai hosi nasaun atu prevene aumenta tan kazu pozitivu iha Timór.

Segundu, nia esplika, pasanjeiru hosi rai-li’ur hotu tenke submete ba kuarentena durante loron 14. Nia informa, traballadór atus ida resin maka fila ona iha semana rua liubá, no ema hamutuk 923 maka hela mesak iha uma iha Dili.

“Traballadór kontinua mantein iha Austrália di’akliu atu hakmaan presaun ba iha Governu Timor-Leste atu prepara fatin kuarentena ne’ebé mak limite tebes sei sira fila hotu,” Embaixadora Almeida hateten.

Traballadór 7000 ne’ebé partisipa iha SWP daudaun ne’e iha Austrália hosi nasaun Timor-Leste no país seluk hosi Ázia Pasífika. Prezidente Nasionál Federasaun Agrikultura, Fiona Simpson, dehan traballadór ne’ebé sira prepara ne’e importante tebes.

“Sein traballadór hosi nasaun li’ur, agrikultór barak sei husik sira-nia produtu maran no mate,” Fiona Simpson hateten iha nia deklarasaun.

Notísia Relevante: Traballadór Sazonál Bele Estende Tan Sira-nia Estadia iha Austrália Durante Tinan Ida

Journalist : Robert Baird

Editór        : Cancio Ximenes

HAKEREK NO HATÁN

Please enter your comment!
Please enter your name here