Portavós CIGC no Koordenadór Ofisiál Ligasaun Forsa Tarefa COVID-19, Rui Maria de Araújo. Imajen Tatoi/Egas Cristovão

DILI, 07 abríl 2020 (TATOLI) – Relasiona ho loron mundiál Saúde ne’ebé monu iha loron ohin, Sentru Integradu Jestaun Krize (CIGC, sigla portugés) enkoraja profisionál saúde sira atu servisu maka’as liután hodi fó asisténsia saúde ba sidadaun Timor-Leste, liuliu iha situasaun agora hodi prevene COVID-19.

Portavós CIGC no Koordenadór Ofisiál Ligasaun Forsa Tarefa COVID-19, Rui Maria de Araújo, lori Sentru Integradu nia naran, hato’o felisitasaun ba profisionál saúde sira iha mundu, espesiál liu iha Timor-Leste ba loron mundiál saúde ne’ebé monu iha loron 7 abríl.

“Ohin loron, mundu tomak selebra loron mundiál saúde nian, maibé ita Timor-Leste ohin labele selebra loron importante ida-ne’e. Maski la selebra, maibé Sentru Integradu Jestaun Krize hakarak hato’o parabéns ba profisionál saúde iha mundu tomak, liuliu iha Timor-Leste ne’ebé servisu maka’as tebes atubele prevene moras ida-ne’e tama barak liután no hada’et iha Timor-Leste”, hateten Rui Maria de Araújo liuhosi konferénsia imprensa iha Sala Sentru Mídia COVID-19, iha Sentru Konvensaun Dili (CCD-sigla portugés), tersa ne’e.

CIGC mós enkoraja ba profesionál saúde hotu atu kontinua dedika-an tomak ba servisu iha área saúde atu servisu maka’as nafatin ba saúde timor-oan hotu.

Nune’e mós, Sentru Integradu agradese ba públiku tomak, hahú husi líder komunitáriu to’o líder nasionál sira, ba esforsu tomak ne’ebé hala’o durante fulan-tolu nia-laran atu Timor-Leste bele prepara-an didi’ak prevene no metiga COVID-19.

“Servisu sei barak no dalan sei naruk, maibé iha loron espesiál ba saúde ne’e hakarak apela katak saúde importaante no saúde iha ita-nia liman rasik no ita hotu presiza fó liman ba malu atu servisu ba saúde ida-idak nian no saúde ema hotu nian”, nia akresenta.

Biban ne’e, Eis Ministru Saúde ne’e mós relata katak daudaun ne’e moras ne’ebé sai risku ba komunidade mak dengue.

“Agora moras dengue mak iha surtu maka’as, iha Munisípiu Ermera no Dili kazu amenta barak. Moras hada’et seluk ne’ebé barak tebes iha Timor-Leste laran mak moras dengue no moras balun husi ema ne’ebé iha kuarentena hafoin hatudu isin manas maibé teste negativu no halo teste dengue ho rezultadu pozitivu dengue. Keta haluha katak TBC mós sei maka’as nafatin iha Timor-Leste no moras hada’et sira seluk sei iha, inklui moras la hada’et sira seluk mós sei maka’as tebes”, nia subliña.

Tanba ne’e maka CIGC apela ba populasaun tomak atu hadook-an husi moras, nune’e labele komplika liu situasaun ne’ebé oras ne’e daudaun infreta iha área saúde iha Timor-Leste.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here