Hahán lokál. Foto/Timor-Leste Offical Tourism Website.

DILI, 07 abríl 2020 (TATOLI)-Diretór Kompañia Samuana Unipessoál Lda, Samuel Alves ‘Asamu’ tersa (07/04/2020) reklama kontratu ho Ministériu Saúde tanba fornese ona ai-han ba pesoál saúde sira iha portu Dili durante estadu emerjénsia maibé seidauk iha kontratu hodi hetan pagamentu.

“Ha’u nia kompañia mak fornese uluk hahán ba  doutór no enfermeiru sira iha portu Dili no Tibar molok governu halo kontratu ho kompañia neen (6) seluk hodi fornese hahán ba kuarentena iha otél sira. Maibe fulan ida liu ona ha’u seidauk iha kontratu pagamentu,” Asamu kestiona  asuntu ne’e liuhosi Jornalista TATOLI, iha Motael, tersa (07/04/2020).

Nia parte simu responsabilidade ne’e diretamente hosi Funsionáriu Diresaun Finansa Ministériu Saúde ne’ebé husu atu tein hodi fornese ai-han ba profisonál saúde ne’ebé destaka iha Portu Dili ho Kuarentena Tibar, Munisípiu Liquiça.

Notísia Relevante : Kompaña Neen Forñese Ai-han  ba Kuarentena 17

“Ha’u la hatene ninia prosesu oinsá, tanba agora profesionál saúde ne’ebé iha portu Dili no Tibar mós menus ona, ha’u rona Ministériu sei dada sira iha tempu badak se hanesan ne’e prosesu pagamentu oinsá,” nia hatutan.

Tuir nia fofoun sira fornese ai-han ba fatin rua ne’e hamutuk ema na’in 22 maibé agora menus ona ba ema 15.

Atu hetan informasaun klaru kona-ba kestaun ne’e maka nia hateten sempre kontaktu responsavel funsionáriu Ministériu Saúde ne’ebé toma konta asuntu ne’e no sira hatan katak iha ona prosesu pagamentu.

Kompaña neen ne’ebé fornese ona ai-han ba fatin kuarentena sira durante ne’e maka Sunivio Entertaiment Unipessoál Lda, Dapur Timor Unipessoál Lda, Vermalhosa Unipessoál Lda, Montez Perere Unipessoál Lda, Genivan Unipessoál Lda, no Fantija Catering Unipessoál Lda.

Jornalista : Tomé Amado

Editór         : Agapito dos Santos

HAKEREK NO HATÁN

Please enter your comment!
Please enter your name here