Ministru Obra Públika, Salvador Eugênio Soares dos Reis Pires. Imajen Tatoli/Egas Cristovão

DILI, 07 abríl 2020 (TATOLI) – Ministru Obra Públika, Salvador Eugênio Soares Dos Reis Pires, informa kliente Eletricidade de Timor-Leste (EDTL) ne’ebé hahú hetan ona subsídiu pre-pagu eletrisidade $15 ba kada kliente, husi operadór telekomunikasaun Timor-Telecom, Telecomcel no Telemor, hahú domingu to’o tersa ne’e hamutuk 30.000 resin ona, husi totál 160.555 ne’ebé sei hetan.

“Horiseik, ha’u simu dadus husi operadór tolu ne’e iha ona kliente 30.000 resin mak simu ona subsídiu pre-pagu tanba subídiu ne’e sein finaseiru ho sistema automátiku ho ninia kontabilidade ne’e klaru loos, ne’ebé kliente hetan gratuita no sei la selu tan”, tenik Ministru Salvador iha Palásiu Governu, tersa ne’e.

Ho nune’e, governante ne’e husu ba kliente iha territóriu laran tomak atu kontinua manda mensajen ba operadór telekomunikasaun tolu, nune’e bele hetan subsídiu pre-prepagu eletrisidade.

“Ami halo nota iha kliente balun iha intrepretasaun sala, tanba dehan pre-pagu eletrisidade ne’e balun ko’a fali, maibé loos subsídiu pre-pagu eletrisidade $15 ne’e ekivalente ho 12,50 kwh”, nia esplika.

Notísia Relevante: Kliente EDTL Apresia no Agradese ba MOP

Governante ne’e klarifika katak subsídiu ne’ebé kliente sira hetan la’ós kréditu ka deve ba EDTL, ne’ebé hanesan espalla iha públiku, maibé kliente hamutuk 160.555 hetan subsídiu pre-pagu $15 sei la selu fali ba EDTL.

“Husu ba públiku labele halo interpretasaun sala hanesan katak subsídiu $15 ne’e EDTL fó de’it $12,50, tanba loloos ne’e mak 125 kwh la’ós $12,50”, nia akresenta.

Ho nune’e, subsídiu $15 ekivalente 125 kwh ba doméstiku 0,12/kwh ne’ebé $15 ekivalente 62,5 kwh ba kliente ho kategoria seluk 0,24/kwh.

Subsídiu pre-pagu ne’e, nia dehan tuir Dekretu Governu artigu 26, ba medida ezekusaun Estadu Emerjénsia hodi prevene propagasaun surtu COVID-19, liuliu ba kliente EDTL sira ne’ebé rejistradu atu evita halibur malu iha fatin ida atu sosa pre-pagu eletrisidade.

“Ita-nia subsídiu ne’e gratuitu no sei la selu tan fali, tanba kliente balun dehan selu fali no balun dehan fali ba sira ne’ebé seidauk asesu eletrisidade la hetan subsídiu, maibé polítika subsídiu nia intesaun ba atu prevene propagasaun surtu COVID-19 no ne’e la’ós subsídiu ekonómiku”, nia realsa.

Tuir despaisu Ministériu Obra Públika (MOP) númeru Ref. 581/MOP/III/2020, intensaun subsídiu naun-finanseira ne’e ba kliente 160.555 atu hamenus movimentasaun kliente konsentra iha fatin hola pulsa atu kontribui ba salva saúde povu nian hala’o prevensaun kontajia COVID-19 aliña ho objetivu Estadu Emerjénsia.

Meiu atu asesu subsídiu pre-pagu eletrisidade mak kliente sira hakerek EDTL#númeru kontadór hodi manda númeru hotline 12150 ne’ebé bele livre ba sim Card Timor-Telecom, Telemor no Telecomcel.

Antes ne’e, kliente EDTL balun ne’ebé hetan ona subsídiu pre-pagu eletrisidade $15 ne’e fó agradesimentu ba Governu, liuliu MOP.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here