Majór Jenerál Lere Anan Timur. Imajen Tatoli/António Gonçalves

DILI, 07 abríl 2020 (TATOLI) – Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur, husu ba polítiku no partidu polítiku-sira atu tau importánsia hodi luta kontra surtu Coronavirus ka COVID-19.

Ba povu tomak iha territóriu Timor-Leste, Majór Jenerál Lere husu atu hela hakmatek iha uma hodi kumpre regra estadu emerjénsia no banati-tuir orientasaun Ministériu Saúde ho Organizasaun Mundiál Saúde  (OMS) atu prevene-an no prevene sosiedade hosi peste letál COVID-19.

Tuir Jenerál nia observasaun pesoál ba situasaun polítika rai-laran iha duni dezentendimentu polítika, maibé nia dehan, di’ak liu mak hotu-hotu konsentra lai ba luta kombate surtu COVID-19 ne’ebé halo mundu pániku, inklui povu Timor-Leste.

“Governu ida tun no governu ida sa’e ne’e la’ós importante, maibé ne’e iha konsekuénsia ekonomia. Ita kuandu mate ,ekonomia mós sei laiha. Tanba ne’e, husu ba ita-nia nai-ulun polítiku-sira atu tur hamutuk fó prioridade ba povu nia problema, liu-liu atensaun ba ameasa Coronavirus,” afirma  Jenerál Lere Anan Timur ba jornalista, ohin, iha Kuartél Jerál F-FDTL, Fatuhada, Dili.

Jenerál Lere hateten, problema, ohin loron, la’ós partidu polítiku, maibé problema hosi lider-sira ne’ebé uluk komanda funu hanesan maun Xanana, Mari Alkatiri, Lú Olo ho José Ramos Horta.

“Ha’u hanoin, uluk ne’e sira haree malu di’ak, keta agora ema ruma mak joga sira karik,’’ hateten Jenerál Lere Anan Timur, hodi afirma-tan dehan, Taur ho Xanana ne’e maun-alin, ema labele nega sira la’ós maun-alin, tanba uluk sira terus no ran fakar hamutuk ho hanoin ida de’it mak ukun rasik-an.

Lere lembra fali katak, Xanana ho Taur nia diverjénsia ideia  la’ós foin akontese, maibé iha ai-laran sira-nain rua sempre tama iha konflitu diverjénsia ideia. Mezmu nune’e, sira nunka sai inimigu ba malu.

Ba povu tomak, Jenerál Lera Anan Timur husu atu  presiza kuidadu no mantén hakmatek iha uma hodi koopera  malu no kumpre medida prevensaun Coronavirus hosi  MS ho OMS.

Jenerál Lere preokupa uitoan tanba daudaun ne’e sirkulasaun transporte privadu hahú makaas no rame iha kapitál Dili.

“Ami ko’alia ho komandante polísia bele toma medida,” hateten Majór Jenerál Lera Anan Timur.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here