Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, 07 abríl 2020 (TATOLI)—Prezidente Parlamentu Nasionál, Arão Noé de Jesus da Costa Amaral hateten, Governu bele rekorre ona orsamentu millaun $250 hosi Fundu Petrolíferu tanba Prezidente Repúblika, Francisco Guterres ‘Lú Olo’ promulga ona.

Nia hatutan, iha segunda (06 abríl 2020), Prezidente Repúblika promulga ona Dekretu-Lei ne’ebé parlamentu haruka ba no loron kinta-feira públika iha Jornál Repúblika ho Lei númeru 2/2020, 6 de abríl.

“Lei ne’e ne’e vigora ona, agora kabe ba governu bele rekorre ba fundu petrolíferu ho millaun $250. Hosi millaun $250 bele finánsia atividade rua. Ida ba kriasaun ba fundu COVID-19 nian ho millaun $150 no millaun $100 ba reforsa kofre estadu hodi finansia rejime duodesimál to’o aprovasaun Orsamentu Jerál Estadu 2020 nian,”  Arão Noé informa ba jornalista sira, iha Parlamentu Nasionál, tersa ne’e.

Prezidente Parlamentu Nasionál esplika, regra ezekusaun ba orsamentu millaun $150 la aplika artigu 31 (Lei Orsamentu no Jestaun Finanseira), maibé governu bele regulariza ho artigu 5 (Fundu COVID-19) hosi lei 2 abríl 2020 (autorizasaun ba realizasaun transferénsia extraordinária hosi Fundu Petrolíferu) ne’ebé aprova hosi Parlamentu Nasionál.

“Agora kabe ba kompeténsia Governu nian atu jere millaun $150 ba COVID-19 ne’e uza artigu 5 hosi lei ne’e nia ko’alia espesífiku oinsá Governu atu ezekuta fundu ba COVID-19 nian. implementasaun fundu ba COVID-19 la aplika artigu 31 no 38 kona-ba Lei Orsamentu no Jestaun Finanseira ninian. Iha lei espefísiu (artigu 5) ne’e mós hateten kuandu Orsamentu Jerál Estadu 2020 prepara atu aprova, orsamentu millaun $250 ne’e tenke inklui iha OJE 2020 nian,” nia esplika.

Maibé, Arão Noé dehan, ba orsamentu millaun $100 tau iha kofre estadu implementa nafatin tuir rejime duodesimál ne’ebé regula iha artigu 31 kona-ba Lei Orsamentu no Jestaun Finanseira ne’e.

Parlamentu Nasionál aprova pedidu levantamentu ne’e iha kinta-feira (2 abríl 2020) no iha sesta-feira (03 abril 2020) haruka ba Prezidente Repúblika, Francisco Guterres ‘Lú Olo’.

Notísia Relevante: PR Promulga Transferénsia Estraordinária Millaun $250 Hosi Fundu Petrolíferu

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here