Susuk aedes aegypti. Imajen hosi google

DILI, 07 abríl 2020 (TATOLI)-Ospitál Nasionál Guido Valadares (HNGV-sigla portugés) durante semana ida hahú loron 01 to’o 07 fulan-abríl rejista ona kazu pasiente ho moras dengue hamutuk ema na’in 24 maibé na’in tolu la konsege salva ka mate.

Iha fulan-janeiru pasiente dengue hamutuk ema na’in 16 no rekupera hotu hafoin hetan tratamentu saúde.

Fulan-marsu HNGV rejista pasiente ho kazu dengue hamutuk 92 no mate na’in ida tanba ne’e pasiente dengue mate durante fulan janeiru to’o inisiu abríl hamutuk ema na’in haat.

Notísia Relevante :Dengue Hahú Domina HNGV

Nune’e ba fulan-fevereiru pasiente dengue hamutuk 45, hosi sira laiha ema ida maka mate tanba hetan tratamentu sedu hosi pesoál saúde iha HNGV.

Totál pasiente dengue ne’ebé halo ona tratamentu saúde iha HNGV hahú fulan-janeiru to’o inisiu abríl hamutuk 177, no na’in haat maka mate ona.

Xefe Unidade Pediátria, Breviado dos Santos hateten pasiente na’in tolu ne’ebé mate durante inisiu fulan-abríl  ho idade labarik hosi tinan 10 mai kraik.

“Fulan Abríl kazu dengue hamutuk 24 no mate iha na’in tolu, na’in tolu mate ne’e tanba mai ho moras komplikadu,” nia relata ba Jornalista Sira iha ninia servisu fatin HNGV, tersa (07/04/2020).

Tuir relatóriu pasiente dengue maioria sofre hosi labarik ho tinan 5 ba to’o 14, maibé hosi tinan lima mai kraik menus.

Durante fulan-janeiru to’o fevereiru, pasiente dengue rejista iha HNGV barak liu maihosi Munisípiu Ermera, maibé iha fulan-marsu to’o inisiu abríl kazu barak liu hosi Dili.

“Ami nia tratamentu ba sira hanesan bain-bain se labarik sira atakasaun maka’as ona entaun ita tau soru no ita fó aimoruk depois ita mos kontrola ba sira,”hateten Xefi Unidade Pediátria.

Kazu dengue barak liu akontese iha tempu udan tanba susuk moris iha ambiente fo’er no la saudavel, tanba ne’e tenki hamoos fo’er iha uma hun, taka bee nalihun, hamoos hariis fatin, proibiu tara roupa iha uma laran no seluk tan.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here