Atividade iha Portu Dili. Imajen Tatoli/Egas Cristovão

DILI, 07 abríl 2020 (TATOLI) – Prezidente Konsellu Administrasaun Portuáriu Timor-Leste (APORTIL), Flávio Cardoso Neves, husu ba Ministériu Saúde atu fasilita protesaun ba COVID-19, durante hala’o atividade portuáriu.

“Ha’u hanoin presiza tebes parte saúde fó ekipamentu ne’ebé maka di’ak ba ami-nia maluk sira ne’ebé maka hala’o servisu, liuliu funsionáriu APORTIL ne’ebé hala’o inspesaun iha ró laran bainhira ró sira lori sasán tama mai Timor-Leste”, dehan responsável portuáriu ne’e ba Agência Tatoli, iha ninia knaar fatin, Portu Dili, tersa ne’e.

Tuir medida Estadu Emerjénsia ne’ebé durante ne’e Governu aplika, katak ró sira ne’ebé lori sasán mai Timor-Leste, tenke atraka de’it iha zona dook, hafoin parte APORTIL rasik maka buka meiu atubele tama mai zona Timor-Leste.

“Ita-nia problema maka ita laiha ekipamentu, tanba ne’e ami ba husu iha saúde atu apoiu ekipamentu, nune’e kuandu sira tun halo inspesaun iha ró hodi hatún sasán iha ró laran, sira bele proteje-an husi surtu COVID-19, tanba kuandu laiha fasilidade ne’ebé mak bele proteje maka lori perigu ba sira-nia vida”, nia akresenta.

Ba kestaun ne’e, Ministru Transporte no Komunikasaun, José Agostinho da Silva,konsidera tanba ida ne’e liga ba seguransa, tanba bele fó ameasa ba ema-nia vida.

“Ha’u bolu ona tékniku sira iha terrenu ne’e atu ko’alia kona-ba kestaun ne’e, tanba sira maka familiár liu. Sira dehan hetan difikuldade, tanba ne’e husu Governu apoiu fasilidade protesaun bainhira halo servisu  iha situasaun COVID-19. Sira husu luvas, máskara no sasán seluk liga ho protesaun, nune’e bele halo servisu ho di’ak iha terrenu”, relata Ministru José Agostinho.

Ministru mós halo ona koordenasaun hodi bele rezolve ketaun ne’e, nune’e pesoál portuáriu sira bele asegura servisu iha portu ligadu ba atrakasaun ró bainhira hatama nesesidade báziku sira.

“Ami halo ona koordenasaun ho Ministériu Saúde atubele apoia fasilidade ba ita-nian ema sira iha Portu Dili no ami-nia koordenasaun kontinua la’o ho esforsu hotu ne’ebé maka iha to’o agora espera iha tempu badak nia laran Ministériu Saúde bele apoiu ekipamentu sira ne’e”, dehan  Ministru.

 Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here