Logotipu Tribunál Distritál

DILI, 07 abríl 2020 (TATOLI) – Tribunál Distritál Dili (TDD) liuhosi prosesu sumáriu ba julgamentu primeiru interrogatóriu, ohin, aplika Termu Identidade Rezidénsia (TIR) ba arguidu AS nu’udar ajente Korpu Seguransa Pesoál  (CSP) ne’ebé komete kazu krime maus-tratos (kejahatan penganiayaan).

Tuir faktu ne’ebé arrola hosi Ministériu Públiku (MP) katak, iha loron 03 abríl 2020, tuku 22:00 Otl,  iha arguidu nia rezidénsia iha Dili, arguidu AS ho lezada MPS hanesan fen-la’en diskute malu tanba de’it telemovel ne’ebé lezada MPS uza hela hodi telefone ba nia inan-aman.

Arguidu AS ezije atu fó lai telemovel, maibé lezada MPS la fó tanba sei telefone hela. Nune’e, arguidu “xateadu” uza forsa hadau de’it, nune’e rezulta pankada iha  lezada MPS nia hasan ne’ebé halo sai bubu no moras.

Ho moras ida ne’e, lezada MPS halai kedas ba halo keixa iha Komandu Polísia Munisípiu Dili, nune’e iha oras balun nia-laran, polísia-sira ba halo kapturasaun ba arguidu AS no detein iha sela polísia durante oras 72 nia laran.

Ba aktu arguidu AS nian ne’e, Ministériu Públiku akuza arguidu AS ho krime Maus-Tratos (kejahatan penganiayaan)  konjuga iha artigu 154 kódigu penál Timor-Leste ho nia moldura penál prizaun tinan rua (2) to’o tinan neen (6).

Defeza Tomázia Umbelina Magno ne’ebé fó asisténsia legál ba arguidu AS esklarese katak, razaun Tribunál aplika TIR ba nia kliente tanba ho aktu krime ne’ebé arguidu AS halo hasoru lezada MPS laiha gravida ruma no la kuazuva ho atestadu médiku kona sofrimentu ne’ebé lezada MPS sente.

“Tribunál aplika TIR hodi arguidu iha uma de’it durante ne’e labele ba fatin do’ok ruma,” hateten  Defeza Tomázia Umbelina Magno.

Tuir prosesu normál bainhira hosi parte nain ba asaun penál hanesan Ministériu Públiku la satisfás ho desizaun Tribunál nian, maka iha periodu loron 15 bele halo rekursu.

Audiénsia julgamentu ne’e prezide hosi juis singular Julmira da Silva, Ministériu Públiku reprezenta hosi Prokuradór Reinato Bernahac no arguidu AS hetan asisténsia legál hosi Advogadu Privadu Tomazia Umbelina Magno ho Xisto Pedroso.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here