Ministru Koordenadór Asuntu Ekonomia interinu no atuál Ministru Reforma Lejizlativa no Asuntu Parlamentár, Fidelis Manuel Leite Magalhães. Imajen Tatoli/Florencio Miranda Ximenes.

DILI, 07 abríl 2020 (TATOLI) – Ministru Koordenadór Asuntu Ekonómiku, Fidelis Manuel Leite Magalhães, iha loron kuarta (08/04) sei aprezenta proposta pakote setór ekonomia ba Konsellu Ministru (KM), ne’ebé liga fó subsídiu ba traballadór no empreza sira iha Timor-Leste iha períodu Estadu Emerjénsia.

“Ami prodús ona proposta pakote integradu setór ekonomia, ho objetivu atu apoia ita-nia ekonomia liuliu ba sidadaun sira durante períodu Estadu Emerjénsia, hanesan antesipasaun ba surtu COVID-19 no implementasaun ba distánsia sosiál, ne’ebé aban aprezenta ona ba Konsellu Ministru”, informa Ministru Fidelis hafoin enkontru ho liña Ministeriál sira iha Palásiu Governu, tersa ne’e.

Governante ne’e akresenta, razaun atu aprezenta pakote ne’e ba KM tanba Governu haree ho situasaun hanesan ne’e nasaun hotu sofre ba ekonomia tanba tuir previsaun Organizasaun Mundiál Finaseiru (IMF, sigla inglés) katak sei akontese krize finaseiru no ekonomia mundiál ne’ebé halo ema moris defísil no ema barak mak sei lakon servisu.

Eis Deputadu Bankada Partidu Libertasaun Popular (PLP) ne’e dehan, iha situasaun defísil hanesan ne’e, Governu labele obriga empregadór sira atu selu trabaladór tuir montante porsentu 100, maibé ezekutivu sira nia papél importante maka atu servisu hamutuk ho empergadór sira atu hamutuk ultrapasa situasaun ne’e.

“Atu ultrapasa situasaun ne’e, Governu buka meiu oinsá atubele apoiu ita-nia traballadór no empregadór sira, atu kontinua sosa nesesidade báziku. Entaun ne’e sei rejista kresimentu ekonomia”, nia akresenta.

Kona-ba fó subsídiu, aktuál Ministru Reforma Lejizlativa no Asuntu Parlamentár ne’e esplika, iha opsaun rua hanesan fó subsídiu ba kada uma kain sira iha Timór laran tomak no fó subsídiu ba traballadór no empregadór sira.

“Montante prevee ba subsídiu ne’e ha’u lakohi divulga lai, maibé dalan ida mak subsídiu ne’e sei ba sidadaun hotu. Entaun traballadór no empregadór mós iha laran no bainhira ita atu fó ba kategoria traballadór sira, ita tenke haree dadus kona-ba traballadór no empreza”, nia adianta.

Tuir nia, Timor-Leste iha sorte tanba iha fundu mina-rai, ne’ebé objetivu importante rua maka haree ba jerasaun aban bain-rua no ida fali ajuda atu ultrapasa kalamidade sira hanesan ne’e.

“Bainhira ami aprezenta aban, ami mós sei aprezenta dokumentu integradu ida atu hahú husi argumentu ba proposta sira no fahe proposta sira ne’e ida pur ida no montante ikus ba subsísiu sira”, Ministru Fidelis afirma.

Tuir dadus, nia dehan traballadór ne’ebé sai benefisiáriu ba subsídiu ne’e hamutuk 30.000, maibé seidauk konta ho funsionáriu sira no traballadór ne’ebé seidauk rejistu ba seguransa sosiál.

Ho nune’e, nia dehan tan, opsaun ida maka fó subsídiu ba kada uma-kain ka kada família iha Timor-Leste hamutuk 213.000 no foti dadus ba empreza no traballadór sira, maibé presiza dadus konkretu.

“Ita iha opsaun rua, atu fó subsídiu liuhosi halo kategoria traballadór no empreza ba kada uma-kain. Tanba ne’e sei hili ida ne’ebé fásil liu subsídiu ba kada uma-ka’in”, nia afirma.

Maibé, Ministru Fidelis dehan Ministériu Koordenadór Asuntu Ekonómiku (MKAE), hamutuk ho liña ministeriál sei haree opsaun sira atu subsídiu ne’e ba kada família ka idade produtivu, bazeia ba setór traballu.

“Ami tenke define didi’ak tanba kada opsaun, polítika ne’ebé ita deside iha impkatu. Tanba ne’e ita presiza haree opsaun ida ne’ebé fásil hodi labele tarde liu”, nia akresenta.

Aleinde ne’e, nia afirma Governu mós haree hela atu fó subsídiu ba jornalista sira.

“Governu preokupa ho traballadór iha nível polítika, makro no agora ba emprezáriu sira preokupa tanba sira tenke selu imi (jornalista) nia saláriu kada fulan. Tanba ne’e, Governu sei haree atu halo polítika ba empregadór no empregadu sira ninian kondisaun”, akresenta.

Entidade ne’ebé envolve diskusaun ne’e hanesan, Ministru Koordenadór Asuntu Ekonomia (MKAE), Fidelis Manuel Leite Magalhães, Ministra Solidariedade Sosiál no Inkluzaun, Armanda Berta dos Santos, Ministru Ensinu Superiór, Siénsia no Kultura, Longuinhos dos Santos, Ministru Obra Públika, Salvador Eugênio Soares dos Reis Pires, Ministru Transporte no Komunikasaun, José Agustinho da Silva, Ministra Finansa interina, Sara Lobo Brites, Sekretáriu Estadu ba Formasaun Profisionál no Empregu, Julião da Silva, hamutuk ho Governadór Banku Sentrál, Abraão Vasconcelos no seluk tan.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here