Eis Primeiru Ministru Xanana Gusmao, ko'alia hela ho komunidade sira ne’ebé kumpre ona kuarenetena loron 14 hodi fila ba ida-idak nia uma. Imajen Tatoli/Antonio Goncalves.

DILI, 06 abril 2020 (TATOLI)–Líder Nasionál Kay Rala Xanana Gumão husu ba sidadaun sira ne’ebé ohin kompleta ona loron-14 no pasa ona ezame médiku atu bainhira fila ba uma tenke sai ezemplu ba família no sosiedade. 

“Orsida sai ba, imi mak tenke fó ezemplu ba ita-nia sosiedade tomak. Sira iha uma simu imi karik, lalika halo festa. Buka oinsa eduka nafatin komudidade atu virus ne’e bele lakon. Prevene hosi imi-nia familia uma laran rasik. Iha ita-nia rain, ita seidauk iha. Grasas adeus, loron ida-nee ha’u mós mai iha ne’e, ita la hasoru malu liuhosi facebook,” dehan Xanana Gusmão bainhira partisipa iha serimónia reintegra timoroan na’in 164 iha kuarentena ba sira-nia komunidade, iha Hotel Novo Horizonte, Metiaut, Dili, segunda ne’e.

Lider Nasionál ne’e hateten, tanba sidadaun hirak ne’e maski tama mai fofoun atu hakuak, rei no besik malu maibé hosi parte Hotel Novo Horizonte mak fó ezemplu di’ak tebe-tebes, atu bele halo prevensaun ba Coronavirus labele mosu iha Timor-Leste.

“Buat ne’e la’ós iha rai ida-idak ninian maibé mai hosi rai liur. Felizmente iha ita-nia rain, ita iha de’it ida. Ita louva tebe-tebes konsiénsia, sosiál, umana, husi ema estranjeiru ida ne’ebé iha hela Vera Cruz ne’eba, tanba nia rasik aprezenta an hodi bele kontrola tiha,” Xanana louva.

Nia mós sita Diretora Prestasaun Serbisu Saúdé Ministériu Saúde, Odete Viegas, dehan tiha ona katak bainhira imi hirak ne’e sente iha síntoma ruma karik, favor aviza kedan, tanba ne’e atu prevene iha kedan hosi família laran.

Xanana Gusmao. Imajen/Antonio Goncalves.

“Ha’u husu ba imi fila ba uma fó hanoin ba imi-nia família sira no vizinu sira. Ida-idak ho nia família ho nia vizinu sira, imi hotu buka eduka malu nafatin. Ita sorte tebes tanba ita-nia rai la hanesan ho ema-nia rain ne’ebé ema tama sai. Ha’u husu ita hotu prevene-an,” Xanana husu.

Entretantu, Governu liuhosi ekipa liña ministeriál COVID-19, ohin, reintegra hikas sidadaun hamutuk na’in 164 iha kuarentena rua hodi fila ba sira-nia uma hafoin kumpre dezisaun Governu tama kuarentena obrigatóriu durante loron 14 nia laran.

Sidadaun hirak ne’e na’in 98 hosi kuarentena Hotel Horizonte kompostu hosi feto 45, mane 53 no na’in 66 hosi Hotel Audian kompostu hosi feto 23 mane 43.

Sidadaun sira ne’e maioria timoroan fila hosi nasaun afetadu COVID-19, tama iha kuarentena iha loron 22 marsu 2020 hodi kompleta ona loron-14 iha loron ohin, 06 abril 2020.

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here