Estudante sira ne’ebé fila hosi rai liur depois kumpre loron-14 iha kuarentena, ohin, 6 Abril 2020 reintegra hikas ba komunidade ka fila ona ba sira-nia familia. Imajen/Antonio Goncalves

DILI, 06 abril 2020 (TATOLI)–Sidadaun na’in 164 ne’ebé kumpre ona kuarentena durante loron-14 nia-laran iha Hotel Audian no Hotel Novo Horizonte hato’o agradese ba Governu Timor-Leste.

Reprezentante sidadaun hirak ne’e, João da Silva (24), hato’o agradese ba Governu Timor-Leste tanba durante loron-14 hela iha kuarentena hetan tratamentu di’ak no dignu hosi Governu Timor-Leste no na’in ba otél sira.

“Agradese ba Governu tanba kontrata otél sira, ami hela gratuita. Durante ami iha ne’e, otél na’in sira atende ami ho di’ak no dignu duni. Tanba ne’e, ami mós agradese tebes ba otél na’in sira ne’ebé durante ne’e haree ami di’ak loos,” dehan  João da Silva ba jornalista sira hafoin Governu realiza serimónia reintegrasaun iha Hotel Novo Horizonte, Metiaut, Dili, segunda ne’e.

Nia hatutan, maski iha loron dahuluk sira tama kuarentena enfrenta difikuldade balun kona-ba hahan maibé iha loron tuir mai, Governu rezolve kedas ho di’ak to’o ohin loron.

João haktuir, nia tama kuarentena ho voluntariamente tanba nia foin fila hosi nasaun Filipina ne’ebé hanesan mós nasaun afetadu ba COVID-19.

Komunidade no Estudante sira ne’ebé fila hosi rai liur depois kumpri loron 14 iha kuarentena, ohin, 6 Abril 2020 fila ona ba sira nia familia. Imajen/Antonio Goncalves.

“Ha’u mai kuarentena voluntáriu la’ós tanba ema mak lori ha’u mai. Tanba, ha’u lakohi fó risku ba família, komunidade no ba nasaun Timor-Leste,” nía haktuir.

Entretantu, nia orgullu ba tanba maski menus fasilidade maibé Governu esforsu duni hodi tau matan ba nia sidadaun sira atu bele prevene pandemia COVID-19 iha Timor-Leste.

Sidadaun hirak ne’e, na’in 98 hosi kuarentena Hotel Horizonte
ne’ebé kompostu hosi feto ema na’in 45 no  mane 53, no ema na’in 66 hosi kuarentena Hotel Audian ne’ebé komposu hosi feto na’in 23 no mane na’in 43.

Sidadaun sira ne’e, maioria timoroan fila hosi nasaun afetadu COVID-19 ne’ebé tama iha fatin kuarentena iha loron 22 marsu 2020 no kompleta ona loron-14 ne’ebé ramata iha loron 06 abril 2020.

Iha biban ne’e, Ekipa Liña Ministerial COVID-19 fasilita mós transporte hodi transporta fila-fali sidadaun hirak ne’e ba iha sira-nia hela fatin iha Dili no balun lori ba munisípiu.

Serimónia reintegra sidadaun sira ne’e ba iha sira-nia komunidade, ohin, hala’o iha Hotel Horizonte ne’ebé hetan partisipa hosi Lidér Nasionál Kay Rala Xanana Gusmão, Brigadeiru Jenerál Forsa Defeza Timor-Leste, Aluc, no prezidente Autoridade munisipiu sira.

Notísia Relevante: Xanana: “Sai Hosi Kuarentena, Tenke Sai Ezemplu Ba Sosiedade”

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here