Ministra Finansa ein ezersísiu, Sara Lobo Brites. Imajen Tatoli/Egas Cristovão

DILI, 06 abríl 2020 (TATOLI) – Atuál Vise-Ministra Finansa, Sara Lobo Brites klarifika, ninia prezensa iha enkontru horiseik iha rezidénsia Prezidente Partidu Congresso Nacional de Reconstrução de Timor (CNRT), Kay Rala Xanana Gusmão iha Lecidere, nu’udar ministra indijitadu husi CNRT atu simu orientasaun husi superiór.

Ministra Finansa ein ezersísiu ne’e, konfirma katak enkontru horiseik atu simu orientasaun hodi reforsa liután servisu Governu hodi luta kontra COVID-19.

Nia subliña, kona-ba enkontru ho Primeiru-Ministru, Taur Mataun Ruak, iha dader ne’e hanesan enkontru regulár no laiha relasaun ho enkontru horiseik nian.

“Ha’u mai enkontru ho Primeiru-Ministru ne’e hanesan enkontru regulár, ne’ebé mak kada semana ha’u sempre mai. Ami nia knaar atu servisu, liuliu iha situasaun ida agora ameasa ba saúde públika, atu dehan mós katak ha’u la lori rezignasaun mai ida maibé ha’u mai atu simu orientasaun atubele atende ba ita-nia nesesidade”, hateten Sara Lobo hafoin sorumutu ho Xefe Governu iha Palásiu Governu, segunda ne’e.

Governante ne’e afirma, enkontru ida horisehik presiza prezensa husi Membru Governu indijitadu husi Partidu CNRT, katak tenke servisu maka’as liután atu atende situasaun agora iha rai-laran

“Knaar ne’ebé ha’u simu atu servisu ba ita-nia rai, liuliu iha situasaun agora. Ha’u ba tuir enkontru ne’e la sente impaktu tanba ha’u servisu hela hanesan ministra”, nia akresenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here