Porta vos Koligasaun foun, António da Conçeição ‘Kalohan'. Imajen/ António Gonçalves

DILI, 06 marsu 2020 (TATOLI)—Portavóz Aliansa Maioria Parlamentár (AMP) no Atuál Sekretáriu Jerál Partidu Demokrátiku (PD), António da Conçeição “Kalohan”, fó-sai katak reuniaun ne’ebé hala’o iha rezidénsia Kay Rala Xanana Gusmão hanesan halibur ideia hodi apoia Governu kombate COVID-19.

Nia hatutan, reuniaun alargada ne’ebé dirije hosi Prezidente Koligasaun Aliansa Maioria Parlamentár (AMP), Kay Rala Xanana Gusmão, iha Lecidere, foka liu ba kombate hasoru COVID-19.

Portavós Aliansa Miaoria Parlamentár (AMP) atuál Sekretáriu Jerál Partidu Demokrátiku (PD), António da Conçeição haktuir, enkontru horisehik ne’e hanesan enkontru kontinuasaun horibainruak nian ne’ebé hala’o iha rezidénsia Prezidente Koligasaun, Kay Rala Xanana Gusmão.

“Kestaun prinsipál ne’ebé ami ko’alia hamutuk ne’e mak oinsá atu promove partisipasaun ida povu tomak nian ba Coronavirus (COVID-19), hanesan aktu prevensaun ida. Ita labele mak Governu de’it mak hola medida iha Estadu Emerjénsia maibé hanoin senáriu sira oinsá mak prevene país ne’e labele hada’et ba moras COVID-19 ne’e. Ne’e ami halo debate naruk oinsá mak atu haree hotu-hotu nia kontribuisaun ba situasaun COVID-19 ne’e rasik,”  dehan António da Conçeição ba jornalista sira, iha resintu Parlamentu Nasionál, segunda ne’e.

Iha reuniaun ne’e, nia dehan, kuadru AMP hosi partidu neen (6), CNRT, PD, KHUNTO, UDT, FM no PUDD tau preokupasaun kona-ba estudante timoroan rihun-ualu resin iha rai-liur hanesan iha Tailándia, Portugál no Filipina.

“Maibé hanoin liuliu situasaun Indonézia no Filipina ninian, ne’ebé prevensaun ba COVID-19 ninian afetadu maka’as liu iha nasaun rua ne’e. Entaun ita buka forma hamutuk ida oinsá mak membru Governu sira hosi CNRT no KHUNTO ne’ebé hamutuk ho Governu ne’e fó nafatin kontribuisaun iha sira-nia aktu governasaun nian,” nia dehan.

Nia afirma, la’ós hapara estudante timoroan sira atu fila maibé hanoin mekanizmu saida mak bele tulun sira atu sira nafatin hela iha ne’ebá hodi proteje sira-nia an iha ema-nia rain.

“Koligasaun ne’e la’ós buka atu hadau ukun maibé atu kontribui hanoin ba Governu hodi bele problema ne’ebé afeta hela nasaun ne’e,” nia dehan.

Potavós ne’e rezeita informasaun ne’ebé fó-sai katak Aliansa Maioria Parlamentár (AMP) sei halo mosaun sensura hasoru Primeiru-Ministru, dada hotu membru Governu hosi CNRT no KHUNTO nian, demonstrasaun hasoru Prezidente-Repúbika, ne’e hanesan espekulasaun mídia nian.

“Buat sira-ne’e la importante, importante mak nasaun tenke bá-oin. Ita la’ós uza dalan sira atu hatún malu ne’e, maibé iha regra konstitusionál sira. Demonstrasaun ne’e só ita tempu funu nian, agora ne’e promove nafatin diálogu no respeita konstituisaun,”  hateten Sekretáriu Jerál Partidu Demokrátiku ne’e.

Notisia Relevante: Reuniaun iha Rezidénsia Xanana Hamosu Pontu Importante Haat

Jornalista : Evaristo Soares Martins

Editór       : Cancio Ximenes

1 KOMENTÁRIU

  1. Ida ne mak dalan nebe diak liu no kapaas liu.
    Obrigado tamba ho hanoin nebe atu ajuda governo hodi kombate pandemia ida ne.
    Aprecia…

HAKEREK NO HATÁN

Please enter your comment!
Please enter your name here