DILI, 06 abríl 2020 (TATOLI) – Komandu Jerál Polísia Nasionál Timor-Leste (PNTL) liuhosi Komandante Polísia Munisípiu Dili, Superintendente Xefe Armando Monteiro, apela nafatin ba komunidade kumpre regra estadu emerjénsia hodi hakmatek iha uma.
Notísia Relevante : PNTL Apela Kumpre Distánsia Sosiál
“Bainhira atu sai hosi uma, só ba asuntu importante hodi prevene-an hosi propagasaun pandemia Coronavirus ka CUVID-19,” hateten Superintendente Xefe Armando Monteiro, ohin, ba jornalista iha Otél Novo Horizonte, Metiaut, Dili.
Prezensa Komandante Armando Monteiro nian iha kuarentena Otél Novo Horizonte, hodi akompaña no sai sasin ba serimónia re-integrasaun abitante 164 ne’ebé kumpre ona kuarentena obrigatóriu durante loron-14 nia-laran.
Tuir observasaun Komandu PNTL nian katak, maske iha implementasaun estadu emerjénsia, maibé sirkulasaun transporte privadu komesa makaas fali ona iha kapitál Dili.
Nia hateten, PNTL la bandu no laiha asaun ruma hasoru sidadaun-sira ne’ebé la kumpre regra estadu emerjénsia, maibé nafatin implementa dekretu governu númeru 3/2020 hodi halo sensibilizasaun. Tanba ne’e, atividade ekonómika kontinua la’o, maibé loja na’in-sira tenke prepara fasilidade bee ho sabaun no mantén distánsia sosiál metru ida.
Jornalista : Nelson de Sousa
Editór : Francisco Simões
