Primeiru-Ministru, Taur Matan Ruak. Imajen Tatoli/ Egas Cristovão

DILI, 06 abríl 2020 (TATOLI) – Primeiru-Ministru (PM), Taur Matan Ruak, hateten atu kombate surtu COVID-19 iha Timor-Leste, maka sidadaun hotu presiza fó kontribuisaun.

Xefe Governu hato’o asuntu ne’e, relasiona ho enkontru ne’ebé realiza iha Prezidente koligasaun foun Aliansa Maioria Parlamentár (AMP), Kay Rala Xanana Gusmão nia rezidénsia iha Lecidera, hamutuk ho kuadru AMP sira, hafoin kuadru ne’ebé partisipa iha enkontru ne’e relata katak enkontru horiseik hodi fahe ideia kona-ba oinsá atu kombate COVID-19 iha rai-laran.

Enkontru ne’e realiza iha domingu, hahú iha tuku 15:00 to’o 21:00 kalan.

Notísia Relevante: Xanana Realiza Sorumutu ho Kuadru AMP Iha Rezidénsia Lecidere

“Atu kombate Coronavírus, sidadaun hotu tenke fó kontribuisaun, ne’ebé ha’u hanoin ne’e di’ak”, dehan PM Taur iha Sentru Konvensaun Dili (CCD, sigla portugés), segunda ne’e.

Kona-ba Membru Governu balun ne’ebé partisipa iha enkontru ne’e tuir Xefe Governu laiha problema tanba enkontru ne’e realiza iha fin de semana.

“Ida-ne’e ha’u hanoin Membru Governu sira ne’ebé hola parte iha CNRT nian mak bá reuniaun ne’e, iha loron sábadu no domingu ha’u hanoin laiha problema”, PM subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here