Paulino Martins, hatudu hela pateka fuan ne’ebé sira kuda iha kintál-laran iha Aldeia Salele Boot, Suku Lawala, Postu Administrativu Tilomar, Munisípiu Covalima. Imajen/Eugénio Pereira

COVALIMA, 06 abríl 2020 (TATOLI)- Susesu koleta osan ho valor $2.000, iha fulan rua nia-laran, iha vida ortikultura la’ós fasil. Todan! Presiza tebes iha vontade boot, badinas no sakrifisiu.

Paulino Martins ho nia espoza Monica Moniz, hanesan agrikultura iha Aldea Salele Boot, Suku Lawala, Postu Administrativu Tilomar, Munisípiu Covalima, dezde tinan 1992 hala’o vida ortikultura, hodi kuda modo, tomate, ai-manas, batar, ai-fariña no seluk-seluk tan atu bele sustenta nesesidade uma-laran.

Iha tinan barak nia-laran, kazál ne’e aproveita rai eransa hosi Monica Moniz nia inan-aman  ho medida ektare ida hodi kuda modo, maibé nia rezultadu natoon de’it hodi sustenta  nesesidade uma-laran no eduka-oan ba eskola.

Kuaze loron tomak, Paulino Martins, gasta nia tempu barak iha de’it kintál-laran hodi hamoos du’ut, fila-rai no kuda ai-han ortikultura nian.

Paulino Martins hamrik iha nia kintál-laran. Imajen/Eugénio Pereira

Ho pasiénsia, vontade no badinas, ohin, família uma-kain Paulino Martins ho Monica Moniz nian, la kuran buat ida ba alimentasaun, hemu no nesesidade ba oan sira-nia presiza eskola.

“Foufoun, ami kuda modo, tomate, ai-manas, batar no ai-fariña. Maibé, presiza tempu entre fulan neen no tinan mak bele koleta,” hateten Paulino, bainhira dada-lia ho Ajénsia Tatoli iha nia kintál-laran iha Aldea Salele Boot, foin lalais ne’e.

Maske ho sakrifisiu boot hala’o vida ortikultura ho rendimentu ki’ik iha tinan barak nia-laran, la halakon vontade no badinas Paulino ho nia-kaben Monica nian, atu aprende hodi koko no koko-nafatin.

Felizmente, Paulino ho Monica ne’ebé sai hanesan aman ho inan ba oan na’in neen (6) ne’e hetan ideia ne’ebé nia konsidera “brillante” hodi kuda fali pateka, tanba tuir nia hatene pateka bele la-dun han tempu naruk atu koleta. Katak, iha fulan rua nia-laran de’it bele koleta ona hodi hetan osan.

Serbisu ho liman-rasik no lori forsa kaer rasik insada fila-rai, lori katana lere du’ut no lori ai-suak ke’e rai, Paulino kuda fini pateka ba rai kuak ida ba ida to’o barak hakonu kedas rai ektare ida.

Loron ba loron hosi madrugada to’o fali rai-nakaras atu kalan ona, maka Paulino fila ba uma tanba nia tenke ho domin kuida fini ne’ebé sira kuda ba rai atu la bele dodok no la bele sukit sai hosi manu fuik-sira.

“Kontente tebes, tanba kuda pateka iha rai ektare ida nia-laran fó rezultadu di’ak mós  ba ami família.  Iha fulan rua nia laran, ami bele koleta ona pateka ho nia rendimentu hosi fa’an pateka fuan bele to’o $2.000,” Paulino hateten.

Nia lia-tun tan dehan, pateka ne’ebé nia ho nia espoza kuda to’o fulan rua bele koleta pateka fuan 1.500 to’o 2.000. no lori ba fa’an iha merkadu no fa’an iha kintál-laran ho folin variable depende ba pateka fuan ne’e nia boot no todan.

“Pateka sira nee nia fuan todan entre kilograma lima (5) no balun to’o kilograma hitu (7). Nune’e, ami fa’an entre $3.00 to’o $5.00 kada pateka fuan depende ba nia boot ho todan,” Paulino hateten.

Paulino ho Monica  hateten, bainhira kuda pateka dala neen (6) iha tinan ida nia-laran bele koleta rendimentu entre $10.000 to’o $20.000.

“Ha’u kontente. Alin-sira mai haree kedas iha ne’e, rai ektare ha’u aproveita kuda pateka ninia rezultadu fuan mós lalais durasaun fulan rua de’it, ita bele koleta pateka fuan barak liu,”  tenik Paulino.

Hanesan agrikultór Paulino rasik kria kooperasaun serbisu ho Loja Supermerkadu sira hanesan, W-Four, Supermerkadu Leader, Loja Agrikultór Governu nian, Grupu Agrikultór Merkadu Tradisionál Lecidere nu’udar kliente permanente ne’ebé sempre ba kompras ninia produtu.

Alende kuda pateka, Paulino ho nia-kaben no família sira ajuda halo mós toos kuda batar, ai-farina, ai-dila, talas, hudi, fore-mungu, fore-rai no variedade ai-han sira seluk tan.

Paulino ho Monica nia-oan na’in neen ne’e, balun eskola iha ensinu báziku, ensinu sekundáriu no balun iha ona ensinu superiór iha  universidade ida iha Kupang, Indonézia.

Simu Konsekuénsia Estadu Emerjensia

Ho situasaun estadu emerjénsia atu halo prevensaun ba propagasaun pandemia Coronavirus ka COVID-19 lori implikasaun makaas ba rendimentu Paulino ho nia-família nian, tanba kompradór ho loja ka supermerkadu ne’ebé baibain ba sosa nia pateka la ba ona.

“Pateka ne’ebé ami kuda iha fevereiru too marsu  ne’e, komesa tasak hotu ona no tuir loloos koleta hodi fa’an ba kliente sira. Maibé, la bele hakat to’o ami nia kintál laran, sá-tan sira hosi Dili, la bele liu, tanba   situasaun estadu emerjénsia limita movimentu ema nian ho transporte-sira,” Paulino lia-tun.

Atu evita pateka sira ne’ebé tasak labele soe estraga de’it, Paulino ho nia espoza ku’u pateka fuan balun loroloron fa’an de’it iha sira-nia uma oin, no abitante-sira ne’ebé halo movimentu ba mai Postu Fronteira Mota Masi, loroloron, sempre sosa hodi hetan netik osan uitoan.

Orgullu ho Paulino

Hosi sorin seluk, Komandante Polísia Unidade Patrullamentu Fronteira (UPF) Superintendente João Belo dos Reis, ne’ebé sempre halo vizita ba Covalima hodi kontrola serbisu membru UPF sira-nian haree esforsu Paulino nian ne’e ho orgullu tebetebes.

“Kuaze tinan-tinan, bainhira ha’u vizita mai haree serbisu UPF nian, ha’u sempre liu iha ne’e, haree katuas ne’e badinas halo toos boot kuda hahán oin-oin, dala ruma sira fó pateka, batar ami lori barak tebes,” Komandante João Belo dos Reis fó sasin.

Nia dehan, tuir loos governu tenke implementa programa “Povu Kuda Governu Sosa” hodi lori produtu sira ne’e ba fa’an iha merkadu kapitál Dili no ajuda agrikultór sira hetan netik osan hodi sustenta sira-nia vida no sira-nia nesesidade uma-laran.

Jornalista : Eugénio Pereira  

Editór       : Francisco Simões

HAKEREK NO HATÁN

Please enter your comment!
Please enter your name here