Otél Novo Horizonte, Metiaut, Dili. Imajen/Felicidade Ximenes

DILI, 06 abríl 2020 (TATOLI)-Ministériu Saúde iha tempu badak sei entrega relatóriu pagamentu otél ne’ebé Governu uza hodi sai fatin kuarentena no mós kompaña fornesedór ai-han ba Ministériu Turizmu Komérsiu Indústria (MTCI-sigla portugés) hodi halo prosesu pagamentu.

Governu liuhosi reuniaun Konsellu Ministru no desizaun Gabinete Integradu Jestaun Krize deside ona  hodi fó responsabilidade ne’e ba MTKI maka toma konta.

Diretór Nasionál Aprovizionamentu Ministériu Saúde, Bernadino Armando da Silva. Foto TATOLI: Eugenio Pereira

Diretór Nasionál Aprovizionamentu Ministériu Saúde, Bernadino Armando da Silva, informa antes ne’e servisu hotu-hotu ne’ebé ligadu ho pandemia globál coronavirus sentraliza iha Ministériu Saúde maibé oras ne’e fahe ona kompotensia ba Ministériu ho Instituisaun Estadu relevante sira seluk.

Notísia Relevante : MTKI Mak Responsabiliza Fatin Kuarentena

“Dokumentu sira ne’ebé mak na’in ba otél no kompaña sira hatama antes ne’e mai ita, sei intrega hotu ba MTKI atu nune’e bele haree ninia prosesu kontratu no pagamentu,” informa nia ba Agência TATOLI, via telefone, segunda (06/04/2020).

Nia tenik tan desizaun ne’e hakmaan ona responsabilidade Ministériu Saúde nian hodi konsentra de’it ba prosesu atendementu saúde pasiente COVID-19.

Notísia Relevante : MS Seidauk Kontrata Kuarentena iha Otél Audian

Alende MTKI, Ministériu Transporte Telekomunikasaun (MTT) mós hetan ona kna’ar hodi tula Timoroan no ema estranjeitu sira hosi Aeroportu no Fronteira Terrestre bainhira fila hosi diaspora hodi ba fatin kuarentena obrigatóriu.

Notísia Relevante :MS Kontratu Otél Villa-Verde Kada Kuartu $ 50

“Ministériu ida-idak haree ona ninia papel, tanba ne’e mak agora ita intrega item rua ne’e ba MTKI tuir sira nia kompotensia atu nune’e bele aselera prosesu kontratu no pagamentu ne’e ho lalais liután,”nia esplika.

Notísia Relevante :Kompaña Neen Forñese Ai-han  ba Kuarentena 17

Ministériu Saúde prevee ona orsamentu ba kada  Otél no kompaña fornesedór sira rihun $ 100 maibé prosesu pagamentu baseia ba relatóriu implementasaun iha terrenu.

Entretantu, Ministériu Saúde halo ona ajudikasaun direta ba kompaña Nasionál neen hodi fornese ai-han ba abitante sira iha kuarentena.

Notísia Relevante :Kompañia Fornesedór Ai-han Seidauk iha Kontratu

No kontratu otél Audian, Novo Horizonte Metiáut, Fantiza Otél, Otél Vila-Verde, D’City otél, otél Katuas, Luz Clarita, Viana otél, Otél Colmera no sira seluk tan.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here