Traballador sira halo hela servisu iha kuarentena foun nebe governu prepara tan iha Tasitolu.Imajen/Antonio Goncalves

DILI, 06 abríl 2020 (TATOLI)-Diretór Kompañia DCO Unipessoál Lda, Dedy informa nia parte sei finaliza prosesu reparasaun no manutensaun ba fatin kuarentena foun, Tasi-Tolu, Dili, iha semana oin tanba obra ne’e atinje ona pursentu 60.

“Ami garante planu semana rua tenke konklui obra ne’e. Ami iha ona esforsu nia laran tanba ami atinje ona pursentu 60. Falta tan pursentu 40,” informa Dedy ba TATOLI, via telefone, segunda (06/04/2020).

Kuarentena foun ne’e iha uma hamutuk 10, kontentór 16. Kompañia konsege foru ona kontentór, kuartu hosi uma 10, monta ona ár kondisionadu ka AC, monta ona kama, kolxaun no seluk tan.

Notísia Relevante : Governu Prevee Rihun $300 Halo Manutensaun ba Kuarentena

Nia hateten tuir loloos obra ne’e bele finaliza antes semana oin, maibé servisu ne’e hetan impedementu hosi grupu balun ne’ebé tenta atu hapara projetu ne’e. Tanba ne’e maka traballadór sira la servisu komesa iha loron sesta (03/04/2020) to’o domingu horiseik.

Trabailadores sira halo hela servisu iha kuarentena foun nebe governu prepara tan iha Tasitolu.Imajen/Antonio Goncalves

Maibé, segunda (06/04/2020) ohin,  kompañia hahú fila-fali servisu ne’e tanba Governu liuhosi Ministériu Saúde konsege rezolve ona dezentendimentu ne’ebé iha.

Nia garante katak projetu ne’e bele konklui iha semana oin tanba traballadór sira servisu hahú oras dadeer to’o fali tuku 11 kalan otl, lorloron.

Hatán ba problema ne’e, Diretór Nasionál Aprovizionamentu Ministériu Saúde, Bernadino Armando da Silva hateten oras ne’e, Governu koloka ona Polísia Nasionál Timor-Leste (PNTL) hodi fó seguransa ba traballadór sira.

“Ami iha domingu lokoraik hasoru-malu ona ho Diretór Dedy hodi husu kontinuasaun  ba obra ne’e, tanba sira atinje tiha ona pursentu 60 hein kompleta tan de’it metade atu finaliza,” hateten Bernadino Armando da Silva, via telefone, segunda (06/04/2020).

Antes ne’e, Diretór Nasionál Aprovizionamentu Ministériu Saúde, Bernadino Armando da Silva, relata Ministériu Saúde prevee orsamentu hamutuk rihun $300 ba projetu reparasaun no manutensaun ba kuarentena Tasi-Tolu.

Kuarentena foun ne’e sei koloka timoroan no estranjeiru sira hodi hela durante loron 14 bainhira fila hosi nasaun afetadu ba prevene pandemia COVID-19.

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here