Luis Roberto, Deputadu Bankada KHUNTO

DILI, 06 abríl 2020 (TATOLI)—Partidu Kmanek Haburas Unidade Nasionál Timor Oan (KHUNTO), sei apoia nafatin VIII Governu Konstitusionál no la apoia mosaun sensura hasoru Primeiru-Ministru, Taur Matan Ruak.

Deputadu Bankada Parlamentár KHUNTO, Luis Roberto hateten, maski enkontru ne’ebé hala’o iha rezidénsia Xanana Gusmão nian, nia la partisipa maibé kona-ba membru hosi KHUNTO atu demite hosi kargu hodi fó solidariedade ba Eis Vise-Ministra Élia dos Reis Amaral ne’e la loos. Tanba, Primeiru-Ministru hanesan xefe Governu iha kompeténsia avalia prestasaun serbisu membru Governu sira.

“Hanesan partidu polítiku laiha liafuan ida dehan tanba de’it Xefe Governu hasai nia membru Governu ida, hotu-hotu fó fali solidariedade ba nia, ne’e la klaru no la loos. KHUNTO sei mantein nafatin VIII Governu. Partidu KHUNTO nia ema sira hanesan membru Governu sira kontinua nafatin serbisu iha VIII Governu nia laran. Enkontru iha maun boot nia rezidénsia ne’e mós ema na’in-rua ka tolu mak partisipa, ne’ebé se enkontru ne’e dehan ko’alia solidariedade no hasoru mosaun sensura ne’e, KHUNTO sei la apoia,” dehan nia ba jornalista sira, iha resintu Parlamentu Nasionál, segunda ne’e.

Nia dehan, mosaun sensura bele halo bainhira Primeiru-Ministru, Taur Matan Ruak, seidauk aprezenta karta demisaun ba Prezidente Repúblika.

“Maibé xefe governu halo ona karta demisaun ba Prezidente Repúblika, entaun ita hotu-hotu hein de’it, desizaun saida mak Prezidente Repúblika atu foti. La’ós dehan mosaun sensura ne’e laiha dalan maibé KHUNTO hakarak sistemátiku uitoan tanba agora ne’e ita hotu-hotu tau interese ba COVID-19 nian,” nia dehan.

Nia afirma, oras ne’e la presiza ko’alia ba asuntu polítika maibé partidu polítiku hotu-hotu tenke apoia Governu kombate COVID-19.

Membru Konsellu Superiór KHUNTO ne’e hateten, se reuniaun ne’e ko’alia kona-ba mosaun sensura hasoru Primeiru Ministru, dada hotu membru governu hosi KHUNTO nia CNRT nian, demonstrasaun hasoru Prezidente Repúblika ne’e, ladún relevante.

“KHUNTO nia pozisaun oras ne’e la konkorda ho senáriu sira hanesan ne’e,” nia hateten.

Entretantu, parte hosi partidu Congresso Nacional da Reconstrução de Timor (CNRT), lakohi komenta kona-ba asuntu ne’e.

Notisia Relevante: Reuniaun AMP Halibur Ideia Apoia Governu Kombate COVID-19

Jornalista : Evaristo Soares Martins

Editór      : Cancio Ximenes

1 KOMENTÁRIU

  1. Parabens Xefi bankada Khunto Luis Roberto.nb sei nafatin apoio VIII governo atual nb lidera hs General TMR

HAKEREK NO HATÁN

Please enter your comment!
Please enter your name here