Diretóra Jerál Prestasaun Saúde, Odete Viegas da Silva.Imajen /Egas Cristovão

DILI, 06 abríl 2020 (TATOLI)–Diretóra Jerál Prestasaun Saúde, Odete Viegas da Silva, informa bá-oin Governu sei esforsu atu hadi’a kondisaun kuarentena liuliu estabelese kuartu ida ba okupante ema na’in-ida hodi prenxe padraun Organizasaun Mundiál Saúde (OMS).

Tuir padraun OMS nian katak okupante ida bele hela iha kuartu ida mesak la’ós ema liu na’in-rua tanba fásil atu da’et ba ema seluk bainhira ida hetan ona moras.

“Ita haree kondisaun kuarentena agora ema rua iha kuartu ida, maibé ita tenke kria ona ema ida iha kuartu ida nune’e bele prenxe kritéria, rekoiñese katak agora ita seidauk prenxe kritéria, maibé bá-oin ita sei halo nune’e bele prenxe kritéria,” katak nia durante konferénsia imprensa, iha Sentru Konvensaun Dili, (CCD-sigla portugés), segunda (06/04/2020).

Nia rekoñese situasaun ne’e akontese tanba espasu fatin la sufisiente hodi akumula ema barak, maibé daudaun ne’e Governu esforsu atu rezolve asuntu ne’e.

Kona-ba auto kuarentena, Diretóra Jerál ne’e subliña bainhira atu implementa auto-kuarentena ba sidadaun sira, família idak-idak presiza kria fatin própriu ba okupante ida hanesan kria kuartu mesak, hariis fatin no mós  koloka profisionál saúde hodi observa sira-nia kondisaun saúde durante hela iha uma.

“Ita hotu haree iha kuarentena no auto-kuarentena ne’e iha suspeitu ema na’in-41, hosi númeru ne’e ema balun hela iha auto-kuarentena, tanba saida mak ita hetan sira-nia dadus, sira rasik iha sintoma diretamente informa kedan mai ekipa vijilánsia nune’e ekipa tun ba foti amostra, ne’ebé sira iha auto-kuarentena koopera di’ak tebes ho ekipa saúde,” tenik Odete.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here