Diretóra Jerál Prestasaun Saúde, Ministériu Saúde, Odete Viegas da Silva, entrega Sertifikat ba komunidade sira nebe kumpri ona kuarenetena loron 14 hodi fila ba ida-ida nia uma. Imajen/Antonio Goncalves

DILI, 06 abríl 2020 (TATOLI)-Governu liuhosi Portavóz Sentru Integradu Jestaun Krize,  Odete Viegas da Silva, apela ba Timoroan 164 ne’ebé segunda (06/04/2020), sai ona hosi Kuarentena obrigatóriu atu mantein hakmatek iha idak-idak nia uma hodi prevene COVID-19.

Diretóra Jerál Prestasaun Saúde, Odete Viegas da Silva.Imajen /Egas Cristovão

Abitante 164 ne’e, mane 96 no feto 68 hela iha kuarentena obrigatóriu otél Novo Horizonte Metiaút Kristu Rei, no otél Audian Dili durante loron 14.

 Notísia Relevante :TL Mantein ho Pozitivu COVID-19 Na’in Ida

“Apelu ba maluk sira ne’ebé mak ohin kompleta ona loron 14 iha periodu inkubasaun, daruak ba komunidade família,  lidér komunitária sira mantein iha idak-idak nia uma kumpre  regra medida prevensaun, iha nesesáriu mak bele sai husi uma se laiha bele hakmatek iha uma,”katak Odete Viegas da Silva, durante konferénsia imprensa iha Sentru Konvensaun Dili, (CCD-sigla portugés), segunda (06/04/2020).

Ba sira ne’ebé livre ona, nia husu atu kontaktu lalais pesoál saúde ka liuhosi númeru emerjénsia 119 bainhira mosu fila-fali sintoma isin manas maka’as, me’ar, dada iis araska no seluk tan hodi hetan atendementu ho lalais no emidiata.

Tuir relatóriu hosi Sentru Integradu Jestaun Krize to’o segunda (06/04/2020), Timor-Leste mantein kazu pozitivu COVID-19 na’in ida, negativu ema 41 no na’in rua sei iha prosesu provavel katak nia pozitivu ka negativu.

Ema hamutuk 986 maka sei hela iha kuarentena obrigatóriu, auto-kuarentena iha Dili no Munisípiu sira.

Abitante 867 hela iha kuarentena obrigatóriu, auto-kuarentena  iha ema na’in 119. Auto-kuarentena iha Dili hamutuk ema 60 no munisípiu 59 totál abitante 119.

”Husi númeru ne’ebé kuarentena iha Dili hamutuk 742 no Munisípiu 125,” informa Portavoz sentru integradu jestaun krize Odete viegas da silva liu husi konferensia imprensa iha sentru Media Prevensaun COVID19 iha sentru konvensoes Dili ohin.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here