Ministru Defeza no Seguransa no Ministru Interiór interinu, Filomeno da Paixão de Jesus. Imajen Tatoli/Egas Cristovão

DILI, 06 abríl 2020 (TATOLI) – Ministru Defeza no Seguransa no Ministru Interiór interinu, Filomeno da Paixão de Jesus, konfirma nia parte partisipa iha enkontru horiseik iha rezidénsia Prezidente Partidu Congresso Nacional de Reconstrução de Timor (CNRT), Kay Rala Xanana Gusmão iha Lecidere, tanba hetan  konvite rasik husi Xanana.

“Ha’u partisipa iha enkontru horiseik, ne’e tanba ha’u hetan konvite hosi Maun Boot Xanana Gusmão, atu husu liu hanoin kona-ba oinsá mak kontribui ba COVID-19. Ha’u dehan bainhira ita hakarak kontribui kombate COVID-19 ne’e, tuir ha’u nia hanoin tanba ha’u kaer migrasaun entaun di’ak liu mak ita-nia estudante sira iha rai-li’ur ne’e lalika mai ona no hela iha ne’ebá. Governu fó de’it subsídiu ba sira liuhosi embaixada, adidu edukasaun, no sira forma grupu organizadu iha fatin ne’ebé sira hela bá, organiza-an didi’ak tanba sira sei simu subsídiu ba nesesidade durante hela iha ne’ebá”, tenik Ministru Filomeno hafoin enkontru ho Primeiru-Ministru, Taur matan Ruak, iha Palásiu Governu, segunda ne’e.

Filomeno adianta, la sala nu’udar Membru Governu ida, marka prezensa iha enkontru hodi tau ideia hamutuk hodi kombate COVID-19 iha rai-laran.

“Maun Boot Xanana fó nia ideia, liuliu ba ami sira ne’ebé iha Governu, nune’e bele lori idea sira ne’e mai hato’o bá Primeiru-Ministru atu haree oinsá bele evita importa COVID-19”, nia realsa.

Tuir governante ne’e, enkontru horiseik la viola regra Estadu Emerjénsia tanba iha ne’ebá nafatin kumpre medida prevensaun sira.

“Ne’ebé atu dehan katak laiha buat ida, ami bá rona, Maun Boot hakarak fó ninia kontribuisaun ha’u senti ne’e pozitivu”, Filomeno akresenta.

Biban ne’e, nia konfirma enkontru ohin ho Xefe Governu hanesan enkontru regulár no nia parte la aprezenta karta rezignasaun hanesan espekulasaun iha li’ur.

“Ha’u la rezigna-an, ha’u só sai husi ha’u nia fatin kuandu lei haruka, lei haruka mak ha’u sai kuandu hasai arbiru maka dada mate de’it mak sai husi Ministériu Defeza”, nia argumenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here