Atividade iha Portu Dili. Imajen Tatoli/Egas Cristovão

DILI, 06 abríl 2020 (TATOLI) – Diretór Jerál Transporte no Komunikasaun, Gaspar de Araújo, informa durante Estadu Emerjénsia iha ró ualu maka atraka iha Portu Dili no ró sira ne’e balun lori sasán nesesidade báziku no balun lori matéria konstrusaun.

“Loron hirak ba kotuk, iha ró ualu no husi ró hirak ne’e rua maka tula fós, haat seluk tula matéria kontrusaun, no ró rua seluk tula semente”, dehan dirijente ne’e ba Agência Tatoli iha Sentru Konvensaun Dili (CCD, sigla portugés), segunda ne’e.

Nia adianta, ró rua ne’ebé maka lori fós ne’e husi empreza privadu nian no agora daudaun halo hela deskaregametu.

“Ró sira ne’ebé lori fós, agora halo hela deskaregamentu ka hatun daudaun ona sasán. Fós ne’ebé sira lori ne’e hamutuk tonelada 4.150 no fós sira ne’e husi setór privadu nian”, Diretór ne’e akresenta.

Nia realasa, kona-ba atividade portu nian agora la’o normál hela maski iha situsaun Estadu Emerjénsia nia-laran ró sira ne’ebé tula nesesidade báziku kontinua tama.

Iha sorin seluk, Prezidente Konsellu Administrasaun Autoridade Portuáriu Timor-Leste (APORTIL), Flávio Cardoso Neves, hateten maski Timor-Leste iha Estadu Emerjénska maibé ró kontinua tama.

“Foin daudaun ró mai lori semente no fós tonelada 4.150 husi kompañia Perisos la’ós Governu nian”, tenik Flávio.

Nia refere liután kona-ba prosesu deskaregamentu, husi parte Portu Dili hamutuk ho ajénsia kompañia maka halo deskaregamentu, sira ne’ebé lori sasán mai la tun husi ró tanba tuir Dekretu-Lei Governu ne’ebé maka aplika iha medida Estadu Emerjénsia la autoriza ema husi ró tun tanba atu prevene COVID-19.

“Tanba ne’e, ita kumpre regra ne’e no agora ró sira ne’ebé maka tama lori sasán nesesidade báziku mai ita, la autoriza atu tun no ita maka ba foti tanba tuir desizaun Governu nian”, dehan responsável APORTIL ne’e.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here