Arquimino Ramos.

Agora dadauk Timor-Leste ita seidauk tarde atu tau esforsu hamutuk hodi luta kontra Covid 19 maibé presiza iha ezersísiu komandu hamutuk ka command exercise liuhosi simulasaun sira atu bainhira ita tama iha situasaun pior, ita fasíl ona atu koordena no atua ho serteza.

Hosi:

Arquimino Ramos, S.Sos, B.Bus, MM

Lia-fuan seguransa mai hosi lian-Latina:  Securus, Se ; Laiha, Curus; tauk, signifika la tauk ka laiha tauk. Seguransa katak; abilidade atu mantein soberania no independensia ho kondisaun moris ne’ebé laiha ameasa no tauk. Nasaun ne’ebé seguru maka Nasaun sira ne’ebé iha preparasaun di’ak hasoru ameasa nia ba soberania inklui seguransa umana. Seguransa umana hanesan mos direitu báziku ne’ebé Estadu hotu-hotu iha dever atu presta ba sidadaun.

Seguransa maka fatór ida importante iha ema nia moris no moris seguru ne’e indikadór ida hosi  moris prosperu. Seguransa umana (human security) tuir PNUD 1994 iha pilár sira maka hanesan, seguransa ambientál (environmental security), seguransa ekonomia, seguransa polítika, seguransa saúde (health security), bioseguransa (biosecurity), seguransa ai-han (food security). Pilár sira ne’e sempre sai hanesan dezafiu ba ema no Nasaun atu hakat liu ka ultrapassa tantu Nasaun bo’ot ka ki’ik, Nasaun riku no kiak, Nasaun dezenvolvidu ka sub dezenvolvidu, ezemplu pandemia Covid 19.

Covid-19 hanesan pandemia globál ne’ebé ameasa seguransa saúde (health security) ne’ebé halakon ona ema barak iha mundu, tuir sekretáriu jerál ONU, Dr António Guterres, katak Covid 19 ne’e krize ne’ebé bo’ot liu iha istória umanidade nian. Dadus hatudu kuaze Nasaun hotu afetadu ho virus corona ho totál kazu milaun ida tuir statistika loron 2 fulan-abril 2020, Estadu Unidu Amerika 235,747, Italia 115,747, España 110,238, Xina 81,589, Fransa 50,105, Iraun 50,468 no seluk-seluk tan.

Ema lakon vida tanba virus ne’e iha Italia mate liu ona ema 10.000, tuir kedas España no Iraun kazu ne’e afeta ona mos ita nia viziñu Austrália no Indonézia, felizmente Timor-Leste ne’ebé iha ona suspetu liu ona 30 maibé pozitivu foin maka ida, maibé Estadu iha dever atu halo preparasaun ne’ebé di’ak atu garante seguransa ne’ebé di’ak ba nia sidadaun.

Artigu 2 hosi lei seguransa nasionál lei númeru 2/2010 ko’alia kona-ba Estadu defende no garante independensia no soberania nia poder polítiku, unidade, intergridade teritóriu nasionál, garante liberdade no seguransa populasaun nian. Instituisaun ne’ebé servisu iha seguransa nasionál maka defesa nasionál, seguransa interna no protesaun sivíl. Iha parte seluk lei seguransa nasionál ko’alia mós kona-ba establesimentu sentru jestaun ba krize (Centro Integrado Gestao de Crise-CIGC), iha parte ida ne’e atan hau halo ona rekomendasaun iha publikasaun livru ho títulu Reforma Setór Seguransa ka Reformasi sektor keamanan iha tinan 2013 atu nomea Diretór ba Sentru Integradu Jestaun ba krize, nune’e bele halo preparasaun rekursu ne’ebé natoon hodi enfrenta situasaun krize ka kalamidade públika liuhosi investimentu iha fasilidade, treinamentu hamutuk entre institusaun sira ho simulasaun ruma, maibé artigu ne’e atu foka de’it ba atuasaun hasoru Covid 19 ne’ebé ita hotu preokupa.

Investimanetu fasilidade no treinamentu sira ne’e presiza halo atu hodi hatoman án, bainhira mosu krize nasionál, dezastre naturál, no Estadu emerjénsia tuir lei seguransa nasionál, atu nune’e instituisaun Estadu idak-idak hatene ona saida maka atu halo (who is doing what) hodi minimiza risku, evita overlapping no seluk-seluk tan.

Agora dadauk Timor-Leste ita seidauk tarde atu tau esforsu hamutuk hodi luta kontra Covid 19 maibé presiza iha ezersísiu komandu hamutuk ka command exercise liuhosi simulasaun sira atu bainhira ita tama iha situasaun pior, ita fasíl ona atu koordena no atua ho serteza. Establesimentu CIGC atu kordena mos implementasaun dekretu Estadu Emerjénsia ne’ebé fó sai ona liuhosi sosializasaun ba regulamentu Estadu emerjénsia ba sidadaun no atividade seluk.

Atu konklui iha rekomendasaun balu maka hakerek nain hakarak hato’o, Ida preparasaun fasilidade no ekipamentu seguransa ne’ebé adekuadu ba instituisaun sira ne’ebé servisu iha liña primeiru ka frontline. Rua Ezersísiu hamutuk entre instituisaun ne’ebé involve iha luta kontra Covid 19 liuhosi simulasaun sira ne’ebé kordena hosi Sentru Integradu Jestaun Krize nian. Tolu ezersísiu hamutuk bele mos ba problema seluk, ida maka dezastre naturál, tanba agora dadauk ita hasoru hela dezastre naturál ne’ebé halo komunidade lakon uma, lakon sasan, lakon vida hodi implementa loloos lei númeru 2/2010 tanba lei ne’e eziste ona tinan 10.

Haat Nomea reprezentante sira hosi instituisaun ne’ebé integra iha lei seguransa nasionál no entidade seluk ba asuntu ne’ebé atu Estadu atua hodi halo fasíl koordenasaun no bem preparadu hanesan kazu Covid 19 involve ministériu saúde. Lima, kontinua sosializa ba sidadaun, tanba kontribuisaun sidadaun hodi luta kontra Covid 19 importante, virus ne’e sei la ba buka ema iha sira nia uma maibé so sira maka ba hasoru virus ne’e iha Estrada ka fatin públiku sira no la kumpre regra Estadu emerjénsia. Neen, publikasaun regulamentu sira iha lian ofisiál rua maka portugés no tetun atu labele falla iha implementasaun, tanba sidadaun barak inklui implementadór lei sira la kumpriende ho di’ak lian-portugés.

Stay home, stay safe!

Artigu ne’e opiniaun pesoál no la reprezenta instituisaun ne’ebé hakarek nain haknar án ba.

Hakerek Nain; Estudante Programa Doutoramentu Jestaun Estratejiku Universidade Widya Mandala Surabaya, Pos Graduado iha Estudu Estratejiku no Resiliensia Nasionál ISCSP- Universidade Lisboa, Dosente iha IDN no UNPAZ. E-mail; arquiminor@yahoo,com.au

HAKEREK NO HATÁN

Please enter your comment!
Please enter your name here