Nakroma atraka ona iha realokasaun urjente terminál ró iha Portu Dili. Imajen Tatoli/Florencio Miranda Ximenes.

DILI, 06 abríl 2020 (TATOLI) – Atu kumpre medida Estadu Emerjénsia atu halo distánsia sosiál ba prevensaun COVID-19, maka Autoridade Portuáriu Timor-Leste (APORTIL) define ona númeru másimu atu tula pasajeiru.

Prezidente APORTIL, Flávio Cardoso Neves, informa autoridade deside pasajeiru husi Dili bá Atauro no Dili bá Oé-cusse, ne’ebé ho Ró Nakroma no Ró Sukses, másimu tenke tula pasajeiru na’in-50 de’it, maski ró hirak ne’e iha kapasidade tula pasajeiru liu maibé tamba atu kumpre desizaun Governu.

Tuir responsável ne’e, regulamentu autoridade APORTIL bazeia ba desizaun Governu liga ho prevensaun COVID-19 nian.

“Ita-nian pasajeiru sira husi Dili bá Atauro no Oé-cusse, bain-bain ne’ebé Ró Nakroma tula pasajeiru ho kapasidade ema na’in-350, agora ita aplika mekanizmu kontrolu pasajeiru husi 350 ne’e tun na’in-50 de’it no la aumenta tan. Bainhira hakarak aumenta kuandu iha dezisaun Governu”, dehan Flavio Cardoso ba Agência Tatoli, iha ninia knaar fatin, Portu Dili, segunda ne’e.

Nia adianta, mekanizmu ida-ne’e foti tanba bele fó livre hodi kumpre distánsia sosiál ka distansia fíziku iha ró laran.

“Ida-ne’e ami halo bazeia ba instrusaun ne’ebé Governu estabelese, pasajeiru na’in-50 ne’e labele tan aumenta. Ami bele aumenta tuir desizaun Governu nian”, Flávio subliña.

Entertantu, bazeia ba desizaun Governu nian, Autoridade Portuáriu ezekuta ba Ró Berlin Nakroma no Ró Sukses, bainhira halo viajen husi Dili ba Atauro no Dili ba Oé-cusse, semana ida dala-ida, Ró Nakroma iha loron kinta no Ró Sukses rasik halo nia opersaun iha loron domingu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here