Rituál duni Coronavirus ka COVID-19 hosi Timor-Leste. Imajen/Eugénio Pereira

BAUCAU, 04 abril 2020 (TATOLI)–Nasaun Timor Leste rai ida ne’ebé independente no iha ‘Hino Nasionál’ nomós iha emblema bandeira hatudu ba mundu katak Timor-Leste iha kultura ne’ebé  forte no independente to’o ohin loron hodi valoriza nafatin tanba kultura mós nasaun Timor-Leste nia identidade iha mundu.

“Ita Timor Leste iha nasaun ne’ebé sempre valoriza kultura no ita hatudu ba mundu katak ita-nia rai doben Timor-Leste ne’e forte ho kultura no independente to’o ohin loron hodi valoriza nafatin tanba kultura mós nasaun Timor-Leste nia identidade iha mundu,” dehan portavós Zona FatumaCa, Xefe Suku Samalari, Sorteiro Magno Siqueira, ba ajénsia TATOLI via telefone hafoin komunidade no lia-nain Zona Fatumaca hala’o ritual satan COVID-19 iha Suku Wailili, sábadu ne’e.

Nia esklarese, serimónia rituál ne’e hala’o ho simples maibé iha valór ne’ebé mak boot tebes maske ema barak kestiona no la fiar kona-ba ritual ne’e.

“Ami nafatin valoriza ami-nia kultura ne’ebé bei-ala sira husik hela mai ita jerasaun foun sira atu kontinua hatutan, atu nune’e bele fó matak malirin mai ita liuhosi bee-matan, aí, fatuk rai no lalehan ne’ebé mak ita uza,” nia dehan.

Hatán ba preokupasaun jovén balu ne’ebé la fiar ba rituál ne’e, nia dehan, ema hotu-hotu presiza tane kultura tanba uluk abó sira fiar mak fatuk-ai iha tinan barak nia-laran depois mak portugés sira lori misaun ka relijiaun katólika mai Timor hodi timoroan sira fiar.

“Antes ne’e ita-nia abó fiar mak fatuk-ai tanba ne’e ita konsidera katak kultura mak eziste uluk depois igreja. Nune’e, agora ita tenke lori parte rua hodi tane nafatin kultura no mós hahí no adora Na’in Maromak liuhosi maneira kultura. Ida ne’e mak identidade nasaun rai doben Timor nian iha mundu,” nia esplika.

Notísia Relevante: Komunidade Zona Fatumaca Halo Rituál Hodi Kombate COVID-19

Jornalistas : Osória Marques

Editór        : Cancio Ximenes

HAKEREK NO HATÁN

Please enter your comment!
Please enter your name here