Enkontru kuadru AMP iha rezidénsia Prezidente Partidu Congresso Nacional de Rekonstrução de Timor (CNRT), Kay Rala Xanana Gusmão, iha Lecidere, domingu (05/04). Imajen Tatoli/Antónia Gusmão

DILI, 05 abríl 2020 (TATOLI) – Prezidente koligasaun foun Aliansa Maioria Parlamentár (AMP), Kay Rala Xanana Gusmão konvoka reuniaun ho kuadru sira durante oras neen nia laran, hahú husi tuku 15:00 to’o tuku 21.00 otl.

Tuir fonte konfirmadu ne’ebé besik kuadru Partidu Congresso Nacional de Reconstrução de Timor (CNRT), katak reuniaun informál ne’e hamosu pontu importante haat.

“Enkontru ohin ne’e, diskute liu ba asuntu haat importante, maka dahuluk aban atu halo restruturasaun ba meza Parlamentu. Daruak, atu halo mosaun sensura hasoru Primeiru-Ministru, Taur Matan Ruak. Datoluk, husu membru Governu husi CNRT no KHUNTO atu hatama reziganasaun hodi fó solidariedade ba iha eis Ministra Saúde (MS) interina, Élia António Amaral dos Reis, ne’ebé Xefe Governu demite ona, maibé pontu ida-ne’e KHUNTO la konkorda. Dahaat, husu Prezidente Repúblika atu dekreta demisaun Primeiru-Ministru, nune’e bele pronúnsia ona Governu foun. Se lae, sei halo demostrasaun hasoru Xefe Estadu. Maibé, pontu ida-ne’e mós partidu KHUNTO la konkorda”, dehan fonte ne’ebé lakohi fó-sai nia naran ne’e ba Agência Tatoli, iha Rezidénsia Xanana, Lecidere, domingu ne’e.

Hafoin enkontru ne’e ramata, Agência Tatoli tenta atu konfirma ho kuadru-sira hosi aliansa foun ne’e maibé sira rejeita atu fó komentáriu.

Enkontru ne’e realiza ona ba dala-rua hafoin Prezidente Repúblika, Francisco Guterres ‘Lú Olo’ halo ezonerasaun ba eis Ministra Saúde interina, Élia Amaral dos Reis iha sesta (03/04) liubá.

Enkontru ne’e partisipa husi Arão Noé de Jesus da Costa Amaral (atuál Prezidente Parlamentu Nasionál), Sara Lobo Brites (atuál Ministra Finansa interina), Dionísio Babo Soares (atuál Ministru Negósiu Estranjeiru no Kooperasaun), José Agustinho da Silva (atuál Ministru Transporte no Komunikasaun), Filomeno da Paixão de Jesus (atuál Ministru Defeza no seguransa no Ministru Interiór Interinu), Prezidente Partidu KHUNTO (atuál Ministra Solidaridade Sosiál no Inkluzaun), Armanda Berta dos Santos.

Nune’e mós, Prezidente Partidu Unidade Dezenvolvimentu Demokrátiku (PUDD), António De Sá Benevides, Prezidente, Uniaun Demokrátiku Timor-oan (UDT), Francisco David Ximenes, Sektetáriu Jerál Partidu Demokrátiku (atuál portavós AMP), António da Conceição, Deputada Frente Mudansa, Isabel Maria Ximenes, Ricardo Nheu, Deputada Bankada CNRT Fernanda Lay, Deputada Carmelita Caetano Moniz, eis Ministra Saúde (MS) interina, Élia António Amaral dos Reis no kuadru AMP seluk tan.

Koligasaun AMP ho konjuntura foun ne’ebé lideradu hosi Prezidente Partidu CNRT, Kay Rala Xanana Gusmão, hamriik iha loron 22 fevereiru 2020, nu’udar resposta Partidu Polítiku neen ho objetivu atu hatán ba rezultadu enkontru líder nasionál sira hamutuk ho Prezidente Repúblika ne’ebé hala’o iha loron 10 fevereiru iha liubá.

Koligasaun AMP foun ne’e hamriik hodi oferese alternativa ba Prezidente Repúblika no aprezenta disponibilidade hodi forma IX Governu iha loron 6 marsu 2020.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here