Imajen Tatoli/Cipriano Colo.

DILI, 05 abril 2020 (TATOLI)–Arsebispu Arkedioseze Metropolitana Dili, Dom Virgílio do Carmo da Silva, SDB, iha esperansa situasaun estadu emerjénsia halo sarani sira tenke partisipa misa hosi uma, bele sai mós oportunidade di’ak ba família sira ne’ebé durante ne’e laiha tempu atu halibur hamutuk ho família bele rekopera hikas.


Dom Virgílio hatutan, maski semana ne’e sarani sira labele halibur hamutuk tanba selebra Semana Santa iha situasaun pandemia COVID-19 ho sosiál distánsia, liuliu Kinta Feira Santa han kalan ikus Jesus Kristu nian ho nia apóstolu sira, sarani sira sei la selebra sesta feira Santa hodi tuir Jesus Kristu nia paixaun, nunee mós selebra vijília paskál hamutuk iha Uma Kreda maibé selebra hamutuk ho ida-ida nia família iha uma.

Arsebispu Metropolitana Dili, Dom Virgílio do Carmo da Silva, SDB. Imajen Tatoli/Cipriano Colo.

“Furak mai ita, iha tinan ida ne’e, ita bele selebra Semana Santa ne’e iha ida-idak ninia uma ho família, aman inan, no oan sira. Familia bele halibur hamutuk iha uma hodi asiste no partisipa misa liuhosi televizaun, no situasaun ne’e bele ajuda ita rekopera hikas ita nia relasaun família ninian, liuhosi reza hamutuk, haksolok hamutuk, han hamutuk, selebra Páskua hamutuk,” dehan Dom Virgílio do Carmo da Silva, SDB, ba sarani sira iha ninia omilia iha misa Domingu Ramos iha Igreja Katedrál, Vila Verde, Dili, domingu ne’e.

Ne’eduni, bibi-atan ne’e husu ba sarani hotu hakaas an ba, aproveita tempu ida ne’e hodi kultiva valór famíliár nian iha ida-idak ninia fatin.

Don Virgílio fó hanoin, Jesus iha nia dalan ba Kalváriu, Ninia inan Virjen Santísima la’o nafatin hamutuk ho Nia. Tanba ne’e, Nia husu katak dalaruma iha akontesimentu sira ne’ebé fó terus makaas iha moris, hatán nafatin ho fiar, maski dalaruma iha nakukun kalan nian maibé iha nakukun ne’e de’it mak bele mosu roman Kristu ninian.

Imajen Tatoli/Cipriano Colo.

“Mai ita invoka nafatin Inan María nia harohan da’et atu iha nakukun ne’e nia laran ita la senté abandonadu. Maibé fiar metin nafatin ba moris nia na’in no moris hias ne’e nia hun,” Arsebispu konvida sarani sira.

Misa Domingu Ramos tinan ne’e iha Igreja Katedral Nosa Senhora Inmaculada da Conceição Villaverde Dili, prezide husi Arsebispu metropolitana de Dili, Dom Virgílio do Carmo da Silva, SDB, konselebrante Munseñor José António da Costa, Padre Leandro María Alves, Padre Bento Barros Perrera ho diákonu Helio da Costa Nunes no diákonu Melchior Falo.

Notísia Relevante: Arsebispu Dom Virgílio Husu Sarani Katedrál Akompaña Misa Hosi Uma

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here